Patuloy na pinag-uusapan online ang kontrobersiya na kinasasangkutan ng P-pop girl group na BINI, matapos umani ng pambabatikos mula sa ilang mga Davaoeño. Ito ay kaugnay ng kanilang naging pahayag sa entablado habang nagpe-perform sa Aurora Festival sa Davao City kamakailan.
Ayon sa mga ulat, habang nagpe-perform ang grupo, nagbiro ang kanilang leader na si Jhoanna Robles tungkol sa lokasyon ng event na umano’y malapit sa isang Crocodile Park. Sa kanyang banat, tinanong niya ang mga manonood, “May crocodile po ba rito? Kasi diba Crocodile Farm ‘to? Meron po?”
Masiglang sinagot naman ng mga Davaoeño ng “meron!” bilang tugon. Ngunit nagulat ang ilan nang biglang humirit si BINI Maloi, na nagsabi ng, “Ahhh! Actually, nandito sila… charot.”
Bagama’t tila pabirong pahayag lamang, hindi ito nagustuhan ng ilang netizens mula sa Davao na nakaramdam ng pang-aasar o di-paggalang. Ayon sa kanila, tila may bahid ng “political shade” ang komento, lalo pa’t kilala umano ang grupo na sumusuporta sa mga “pinklawan” o kampo ng dating kandidato sa halalan.
Maraming Davaoeño ang naghayag ng kanilang pagkadismaya sa social media, partikular sa Facebook at X (dating Twitter). May ilan pa ngang nanawagan ng boycott laban sa grupo, habang ang iba naman ay nagsabing dapat umanong ideklara ang BINI bilang persona non grata sa lungsod.
Isa sa mga nagkomento ay nagsabi, “BINI_ph persona non grata sana kayo sa Davao.”
Sinundan pa ito ng iba pang netizens na nagsabing, “Declare BINI persona non grata in Davao.” at “Boycott na yan.”
May ilang tagahanga rin ng grupo ang nagtangkang ipagtanggol ang mga miyembro. Ayon sa kanila, malinaw na biro lamang ang mga sinabi ng mga performer at hindi dapat palakihin ang isyu. Isa pa, dagdag nila, sanay ang BINI na magpatawa at makipagkulitan sa mga audience bilang bahagi ng kanilang lively stage presence.
Gayunpaman, sa gitna ng mainit na diskusyon, marami pa ring netizens ang nanindigang hindi kanais-nais ang biro. Ayon sa kanila, bilang mga public figure at pambansang performer, dapat maging mas maingat sa mga salitang binibitawan, lalo na kapag nasa ibang rehiyon at may kultural o politikal na sensibilidad.
Hanggang ngayon ay wala pang opisyal na pahayag mula sa BINI o sa kanilang management ukol sa naturang isyu. Gayunpaman, patuloy ang mga komento at diskusyon online, kung saan hati ang opinyon ng publiko—may mga patuloy na nagtatanggol sa grupo at mayroon ding naniniwalang dapat silang humingi ng paumanhin.
Ang insidenteng ito ay nagsilbing paalala sa mga artista at performer na sa panahon ngayon ng social media, anumang biro o pahayag, gaano man kaliit o kabiruan, ay maaaring bigyan ng mas malalim na interpretasyon ng publiko—lalo na kung ito ay may halong konteksto ng politika o rehiyonal na isyu.
Walang komento
Mag-post ng isang Komento
Share your opinion now!