Umani ng matinding reaksiyon mula sa netizens ang Kapuso artist na si Shuvee Etrata matapos muling lumutang online ang isang lumang live video kung saan tahasan siyang nagpahayag ng suporta sa dating Pangulong Rodrigo Duterte.
Sa social media platform na X (dating Twitter), kumalat ang ilang bahagi ng nasabing live broadcast, kung saan emosyonal na ikinuwento ni Shuvee ang kanyang naging reaksyon nang marinig ang balita tungkol sa pagkakaaresto umano ni Duterte noong Marso 2025.
Ayon sa dalaga, hindi niya napigilang maging emosyonal dahil sa malaking ambag umano ng dating pangulo sa kanilang lugar.
"Naiyak talaga ako kagabi, empath kasi ako. kasi sa lugar namin, ang laki ng naitulong ni PRRD,” aniya sa kanyang video.
Idinagdag pa ni Shuvee ang kanyang opinyon tungkol sa isyu ng droga sa bansa. Ayon sa kanya, malaki ang epekto ng kampanya laban sa droga sa kanilang komunidad, at personal siyang nagpapasalamat sa mga naging hakbang ng administrasyon ni Duterte.
“like ang drugs talaga guys.. ang laki niyan na thing. ewan ko lang sa inyo pero nagpapasalamat talaga ako kay duterte,” dagdag niya.
Samantala, sa isa pang hiwalay na video na kumalat rin sa social media, tila nabanggit ni Shuvee—bagamat hindi tahasang sinabi—na ibinoto niya si Pangulong Ferdinand "Bongbong" Marcos Jr. noong 2022 national elections. "Para sa akin talaga, parang nabudol ako ni Bongbong,” biro niya sa video.
Dahil sa mga pahayag na ito, agad siyang naging sentro ng kontrobersya. Maraming netizens ang nagpahayag ng pagkadismaya, sinasabing tila kinokonsinti ni Shuvee ang dating administrasyon sa kabila ng mga umano’y paglabag sa karapatang pantao at mga naitalang insidente ng karahasan.
Isang netizen ang matapang na nagpahayag ng kanyang saloobin: “Shuvee etrata, certified DDS, naawa daw kay duterte nung nakulong. pero sa mga inosente na namatay, wala? your preaching on your bc and igs is useless. walk the talk, girl. performative final boss.”
Gayunpaman, hindi lahat ay bumatikos. May ilan ding netizens ang nagtanggol kay Shuvee, sinasabing may karapatan siyang magkaroon ng sariling opinyon lalo na kung personal niyang naranasan ang epekto ng mga polisiya ng dating administrasyon.
“Kanya kanya ng opinion dai di natin dapat husgahan ang tao base lang sa narinig natin what if ang laki ng naging epekto ng drugs sa bayan nila what if ang daming mga inosenteng namatay dahil sa mga adik sa lugar nila sana bago tayo mag sabi ng mali sa iba think muna,” pagtatanggol ng isa pang netizen.
Sa kabila ng kaliwa’t kanang batikos at depensa mula sa publiko, nananatiling tahimik si Shuvee hinggil sa isyu. Wala pa siyang inilalabas na opisyal na pahayag upang linawin ang kanyang panig o sagutin ang mga akusasyong ipinupukol sa kanya.
Samantala, patuloy pa rin ang diskusyon sa online platforms ukol sa pagiging “influential” ng mga artista pagdating sa mga sensitibong isyung politikal. Marami ang nananawagan ng mas maingat at responsable nilang paggamit ng kanilang platform, lalo’t malaki ang epekto nito sa opinyon ng kanilang followers.
Ang sitwasyong ito ni Shuvee Etrata ay paalala kung gaano kabigat ang responsibilidad ng mga personalidad sa harap ng publiko. Sa panahon ng mabilisang pagkalat ng impormasyon online, isang salita o aksyon lang ay maaaring magsimula ng malawakang reaksyon—positibo man o negatibo.
Walang komento
Mag-post ng isang Komento
Share your opinion now!