Ate Gay Isiniwalat Ang Pagkakaroon Ng Kanser Stage 4 Na, Baka Hindi Na Makakarating Sa 2026

 Isang mabigat na pagsubok ang kasalukuyang kinakaharap ng kilalang komedyanteng si Ate Gay matapos kumpirmahin na siya ay may stage 4 na kanser. Sa panayam na inilabas sa programang Kapuso Mo, Jessica Soho, inilahad ni Ate Gay ang kanyang pinagdadaanan at ang panawagan niya ng panalangin sa publiko habang patuloy siyang lumalaban sa kanyang kondisyon.

Ayon sa kanya, nagsimula lamang ito sa tila simpleng sintomas na kanyang ikinagulat. “It started parang beke lang, hindi pantay ang mukha ko,” kwento niya. Dahil dito, agad siyang sumailalim sa mga pagsusuri gaya ng ultrasound at CT scan, at sinabihang kailangang kumuha ng biopsy para matukoy ang tunay na kalagayan.

Sa una, sinabi ng mga doktor na mukhang benign ang bukol — o hindi naman nakamamatay. Ngunit sa kalaunan, matapos ang mas malalim na pagsusuri at konsultasyon, nalaman ni Ate Gay ang mas masaklap na balita: isang agresibong uri pala ito ng kanser, at nasa huling yugto na ito.

“May show ako sa Canada, medyo lumalaki na siya. At saka nagbi-bleed nang nagbi-bleed,” aniya. “Mahirap ngayon ang lagay ko. May kanser ako, stage 4 daw.”

Isa sa mga pinakamahirap tanggapin para sa kanya ay ang sinabi ng mga doktor na hindi na umano siya maaaring operahan. Ayon sa mga ito, limitado na ang kanyang mga opsyon at tinatayang hanggang taong 2026 na lamang ang kanyang itatagal, batay sa kasalukuyang kalagayan ng kanyang katawan.

“Wala raw lunas. Masakit sa akin. Halos araw-araw umiiyak ako. Hindi naman ako nagkulang kay Lord. Although lagi kong sinasabi na walang himala," emosyonal na pahayag niya.

Gayunpaman, sa kabila ng matinding pagsubok, pilit pa rin niyang pinanghahawakan ang kanyang pananampalataya. Nanawagan siya sa publiko, lalo na sa kanyang mga tagasuporta at kaibigan, na ipagdasal siya sa panahong ito ng pangangailangan.

“Kailangan ko po ng dasal. Kailangan ko po ng lakas at sana po makayanan ko ang araw-araw kong buhay sa ngayon,” sabi niya habang pinipigilan ang luha.

Matatandaang noong taong 2021, naospital din si Ate Gay dahil sa pneumonia. Sa kabila ng ilang linggong pananatili sa ospital, matagumpay niya itong nalampasan. Ngayon, mas malala man ang kanyang iniindang sakit, hindi pa rin nawawala ang kanyang pag-asa na isang araw ay muling babalik ang kanyang lakas at sigla.

Habang pansamantala siyang huminto sa mga pagtatanghal upang bigyang-daan ang kanyang gamutan, umaasa si Ate Gay na ang suporta at panalangin ng publiko ay magiging sandigan niya sa gitna ng pinakamabigat na laban ng kanyang buhay.