Isang post na dating makikita sa opisyal na Facebook page ni Quezon City District 1 Representative Arjo Atayde ang bigla na lamang nawala sa social media, at ito’y agad na umani ng espekulasyon mula sa publiko. Ang naturang larawan ay nagpapakita ng isang flood control project sa isang creek sa Barangay Culiat, kung saan makikita rin si Arjo sa mismong groundbreaking ceremony ng proyekto.
Ang isyu ay mas lumaki pa nang maiugnay ang pangalan ng aktor-politiko sa kontrobersyang kinasasangkutan ng ilang mambabatas at politiko na umano’y nakatanggap ng pondo mula sa mag-asawang Discaya. Matapos lumabas ang balita, nagsimula ang ilang netizens na maghukay ng ebidensya at mga "resibo" na may kaugnayan kay Arjo.
Isa sa mga ibinahaging ebidensya ng netizens ay isang dating Facebook post mula mismo sa page ni Arjo. Sa larawang iyon, makikita siyang kasama sa inagurasyon ng flood control project kung saan nakatayo siya sa tabi ng isang malaking tarpulin na naglalaman ng detalye ng proyekto — kabilang na ang pangalan ng contractor, ang Wawao Builders, at ang halagang P50 milyon.
Ang Wawao Builders ay kabilang umano sa mga pangunahing kontratista ng gobyerno na tumanggap ng mga proyekto para sa flood control. Batay sa mga ulat, ito’y bahagi ng top 15 contractors na pinondohan para sa mga proyekto ng pamahalaan.
Isang concerned netizen ang nagbahagi ng screenshot ng naturang post sa Reddit. Ayon sa kanyang caption, “Congressman Arjo Atayde’s FB page just deleted this image detailing a P50M flood control project with Wawao Builders.”
Hindi nagtagal ay bumuhos ang samu’t saring reaksyon mula sa online community. Maraming netizens ang nagpahayag ng pagkadismaya at hinala, lalo na’t tila biglaan at walang paliwanag ang pagkakabura ng post. May ilan ding nagpahayag ng kanilang opinyon ukol sa pagiging transparent ng mga opisyal sa mga ganitong proyekto.
May netizen pang nagsabing, “someone failed to tell him the most important warnings about online content: 1.) if it pops on the internet, it stays on the internet. 2.) If you try to cover it up and threaten people into removing said content, it’ll get shared even more.”
Ang ilang netizens ay nagdududa kung bakit tinanggal ang post gayong ito’y para sa isang pampublikong proyekto na dapat ay bukas at malinaw sa mamamayan. May mga nagsasabi ring hindi sana kailangang burahin ang post kung wala namang tinatago o dapat ikahiya.
Habang patuloy ang mainit na diskusyon online, wala pang opisyal na pahayag si Rep. Arjo Atayde hinggil sa isyu ng pagkakabura ng naturang post, o sa mga paratang ng ilang netizens na may kaugnayan ito sa kontrobersyal na mga flood control contracts.
Sa gitna ng usapin, nananawagan ang publiko ng mas malinaw na paliwanag at mas bukas na pamamahala, lalo na pagdating sa paggamit ng pondo ng bayan. Para sa ilan, hindi sapat ang pagtanggal ng isang post upang malinis ang pangalan, kundi kailangang harapin at linawin ang mga isyung ibinabato.
Walang komento
Mag-post ng isang Komento
Share your opinion now!