Cong TV Umalma Sa Mga Nambabatikos Sa Pagkikilahok Sa Rally Kontra Corruption

 Sa pamamagitan ng isang Facebook post, ibinahagi ni Cong TV—isang kilalang social media influencer at content creator—ang ilang larawan mula sa mismong protesta. Nilakipan niya ito ng matapang na caption na, “Magnanakaw ka tapos gusto mo walang sisita? Hahaha Gago ka ba?”

Ang prangkang pahayag na ito ay agad na umani ng iba't ibang reaksiyon mula sa publiko. Habang maraming netizen ang sumang-ayon at pinuri ang kaniyang katapangan, hindi rin nawala ang mga bumatikos sa kanya. Ilan sa mga kritiko ang bumalik sa nakaraan, at binuksan muli ang isyu ng umano’y suporta raw nila ni Viy Cortez—ang kaniyang asawa—sa ilang mga personalidad sa politika at party-list noong panahon ng halalan.

Dahil dito, naglabas ng matapang na sagot si Cong TV para ipagtanggol ang kanyang panig. Aniya, hindi dapat maging batayan ng pananahimik o kawalan ng karapatang magsalita ang pagkakaiba ng opinyon sa pulitika. "Pag ba magkaiba ba tayo ng sinuportahan nung eleksyon wala ng karapatang magalit sa mga nangyayari sa bansa?" tanong ni Cong.

Dagdag pa niya, hindi lamang ang mga bumoto sa isang panig ang apektado ng mga isyu sa gobyerno—lahat ay biktima. "Sabihin niyo na gusto niyong sabihin. Pare-pareho lang tayong ninanakawan," giit niya.

Iginiit din niya na mas kahihiyan pa raw ang pagiging tahimik sa harap ng mga isyung mahalaga. “Mas nakakahiya ‘yung manahimik na lang habang nangyayari ang lahat, kesa sa isang taong pinipiling gamitin ang kanyang boses,” pahayag pa ni Cong TV.

Ang "Trillion Peso March" ay isang malaking pagkilos na inorganisa ng iba’t ibang grupo upang ipahayag ang galit ng taong-bayan sa umano’y malawak at patuloy na katiwalian sa pamahalaan. Mula sa mga ordinaryong mamamayan hanggang sa ilang personalidad, marami ang nakiisa sa panawagan para sa hustisya at pananagutan.

Samantala, patuloy pa rin ang mga diskusyon sa social media ukol sa naging posisyon ni Cong TV. Ang ilan ay sinasabing nararapat lamang ang kanyang ginawa, habang ang iba naman ay nananatiling kritikal at naniniwalang may bahid pulitika ang kanyang motibo.

Sa kabila ng lahat, nanindigan si Cong TV na ang kanyang intensyon ay para lamang manawagan ng pagbabago, at hindi para isulong ang pansariling interes o politikal na agenda. Sa ngayon, tila hindi pa rin natatapos ang mainit na palitan ng opinyon sa online world hinggil sa isyung ito.