Gerald Anderson Nilinis Ang Pangalan Ni Vanie Gandler, Hindi Raw Ito Ang Third Party

 Naglabas ng pahayag ang aktor na si Gerald Anderson upang sagutin ang mga kumakalat na espekulasyon online na isinasangkot ang professional volleyball player na si Vanie Gandler sa naging hiwalayan nila ng aktres na si Julia Barretto. Sa pinakabagong episode ng Ogie Diaz Showbiz Updates noong Lunes, Setyembre 22, 2025, isiniwalat ni Ogie Diaz na mismong si Gerald ang tumawag sa kanya upang linawin ang naturang isyu.

Ayon kay Ogie, nais iparating ni Gerald na wala umanong katotohanan ang mga balitang may namamagitan sa kanila ni Gandler. Giit ng aktor, matagal na raw umiikot ang tsismis na ito ngunit pawang walang basehan. 

“Una na d’yan ang kaniyang naging paglilinaw na hindi si Vanie Gandler ang dahilan [ng kanilang paghihiwalay]. Matagal na raw itong Vanie Gandler issue pero ito’y wala raw katotohanan talaga,” ani Ogie.

Ikinuwento rin ni Ogie na sinabi ni Gerald na wala siyang personal na koneksyon kay Vanie. Hindi raw sila magkakilala nang personal at hindi rin nagkakausap, kahit sa text o tawag. “Wala raw silang komunikasyon sa kahit anong paraan,” paliwanag ni Ogie. 

“Hindi niya nga raw ito kilala ng personal o nakakausap o nakaka-text, nakakatawagan, wala. Nanonood lamang daw siya ng volleyball pero hindi para tutukan si Vanie, ini-link lang siya dito.”

Ayon pa kay Ogie, sinabi rin ni Gerald na ibang dahilan ang naging ugat ng kanyang paghihiwalay kay Julia. Sa kabila nito, inamin din umano ng aktor na siya ang may pananagutan sa kung bakit nauwi sa hiwalayan ang kanilang relasyon. 

“Sinabi ni Gerald na iba ang dahilan at inako rin niya na siya ang may kasalanan ng break up nila ni Julia pero hindi na ito idinetalye pa ni Gerald,” ani Ogie.

Sa gitna ng kaliwa’t kanang batikos mula sa publiko, inilahad din ni Ogie na labis nang nasasaktan si Gerald sa mga paratang at pambabatikos sa kanya. “Durog na durog na raw siya sa mga bashings,” ayon kay Ogie. Kaya naman isa sa layunin ng kanyang pagtawag ay upang linawin at hilingin na sana'y matapos na ang kontrobersiya, lalo na ang pagkakadawit kay Vanie.

Sa huli, iminungkahi rin ni Ogie na mas makabubuti sana kung magsasalita rin si Vanie Gandler upang tuluyang matapos ang spekulasyon. Gayunman, sa kasalukuyan ay tila tahimik pa rin ang kampo ng atleta at wala pa ring inilalabas na pahayag ukol sa isyu.

Ang pangyayaring ito ay muling nagpapakita kung paano mabilis na lumalaki ang mga isyu sa mundo ng showbiz sa tulong ng social media. Sa isang iglap, ang isang walang basehang haka-haka ay maaaring magdulot ng matinding epekto sa personal na buhay ng mga personalidad.

Habang wala pang pahayag mula kay Julia Barretto at Vanie Gandler, tanging sa panig ni Gerald Anderson pa lamang nagmumula ang paglilinaw sa isyung ito. Umaasa ang publiko na sa lalong madaling panahon ay matuldukan na ang kontrobersiyang ito upang makapag-move on na ang lahat ng sangkot.