Martires Niresbakan Si Sen. Kiko Pangilinan Sa Hindi Pagsama Sa Yaman Ni Sharon Cuneta Sa SALN

 Matapang na sinagot ni dating Ombudsman Samuel Martires ang mga pahayag ni Senador Francis “Kiko” Pangilinan, matapos nitong hamunin ang dating opisyal na ipalabas sa publiko ang kanyang Statement of Assets, Liabilities, and Net Worth (SALN). Sa halip na umatras, binalikan ni Martires si Pangilinan at tinuligsa ito dahil umano sa pagkukulang ng senador sa sariling SALN—lalo na sa hindi raw pagsasama ng mga ari-arian at kayamanan ng asawang si Sharon Cuneta.

Sa isang panayam sa programang “On Point” ng Bilyonaryo News Channel (BNC) kasama si anchor Pinky Webb, diretsahang sinabi ni Martires na tila mismong si Pangilinan ang lumalabag sa batas na madalas nitong ginagamit laban sa kanya. Ayon sa dating Ombudsman, malinaw sa Republic Act No. 6713 o Code of Conduct and Ethical Standards for Public Officials and Employees na dapat ay isinasama ng mga opisyal ng gobyerno ang lahat ng pag-aari at kita ng kanilang asawa sa SALN.

“Bakit hindi niya isinama ang mga ari-arian at utang ng asawa niya, si Sharon Cuneta, sa kanyang SALN? Ang batas malinaw—ang income at assets ng spouse ay dapat i-declare,” pahayag ni Martires. Dagdag pa niya, “Kung gano’n, sino ngayon ang lumalabag sa batas? Ako ba, o siya?”

Binigyang-diin pa ni Martires na wala siyang itinatago at handa siyang harapin ang anumang imbestigasyon kung kinakailangan. “He’s the one violating the law actually, not me. Wala akong tinatago,” giit niya.

Ang palitan ng banat ay nagsimula matapos manawagan si Sen. Pangilinan kay kasalukuyang Ombudsman Jesus Crispin Remulla na ilabas ang SALN ni Martires — mula pa noong panahon na siya ay nagsilbi bilang Associate Justice ng Korte Suprema hanggang sa kanyang pagbaba bilang Ombudsman sa taong 2025. Sa isang post sa social media platform na X (dating Twitter), sinabi ni Pangilinan na baka raw “magkaalaman” kung bakit tutol si Martires sa paglalantad ng kanyang SALN.

Hindi naman ito pinalampas ng dating Ombudsman. Sa panig ni Martires, sinabi niyang walang problema kung hihilingin lamang ni Pangilinan na ipakita ang SALN niya, pero sumobra na raw ito nang magbigay pa ng insinuasyon na may tinatago siya. “Kung sinabi lang niya na ‘ipalabas ang SALN ni Martires,’ ayos lang sana. Pero ‘yung linya na ‘para magkaalaman,’ ibang usapan ‘yun,” ani Martires. “Kung may pinaniniwalaan siyang anomalya, kasuhan na lang niya ako.”

Bilang tugon, sinabi ni Martires na bukas siya sa pagpapakita ng kanyang SALN, basta’t protektado ang ilang sensitibong detalye tulad ng address at personal information na maaaring magbanta sa kanyang seguridad. Ayon sa kanya, hindi niya tinututulan ang transparency, ngunit dapat din daw isaalang-alang ang privacy at kaligtasan ng mga opisyal ng gobyerno at ng kanilang mga pamilya.

Ang isyu ay nag-ugat sa mas malawak na debate tungkol sa transparency at accountability ng mga public officials, lalo na sa usapin ng public disclosure ng SALN. Sa ilalim ng batas, ang mga opisyal ng gobyerno ay inaatasang magpasa ng tapat na deklarasyon ng kanilang ari-arian at utang, kasama na ang mga sa kanilang asawa at mga anak na menor de edad. Gayunman, naging kontrobersyal ito sa mga nakaraang taon dahil sa mga limitasyong ipinapatupad ng Office of the Ombudsman sa pag-access sa mga dokumentong ito.

Para kay Martires, malinaw ang punto — kung maglalantad man ng SALN, dapat lahat ng opisyal ay patas na sumunod sa parehong pamantayan, kabilang na si Sen. Pangilinan. “Kung gusto niya ng transparency, simulan niya sa sarili niya,” aniya.