Lotlot de Leon, Nagbigay-Pugay sa Yuma0ng Theater Icon na si Cocoy Laurel

 Isang emosyonal na mensahe ng pasasalamat at pag-alala ang ibinahagi ng aktres na si Lotlot de Leon bilang pagpupugay sa beteranong aktor sa entablado at mang-aawit na si Cocoy Laurel, na pumanaw noong Hunyo 14 sa edad na 72.

Sa pamamagitan ng isang Facebook post na inilathala sa page ng pamilya ni Nora Aunor—ina ng aktres—ibinahagi ni Lotlot ang huling alaala niya sa tinuturing niyang malapit na kaibigang si "Tito Cocoy." Ayon sa kanya, dumalaw pa ito sa burol ng kanyang ina noong unang bahagi ng taon, at iniabot sa kanya ang isang espesyal na painting na likha nito.

Ani ni Lotlot, “‘Lot, please keep this… I’m giving this to you as a gift. Keep it.’ That painting is more than just a piece of art. It’s a symbol of your deep friendship and lasting love for Mom.”

Si Cocoy Laurel, na ang tunay na pangalan ay Victor Laurel, ay isang kilalang personalidad sa larangan ng teatro sa Pilipinas. Maliban sa kanyang talento sa pag-arte at pagkanta, kabilang din siya sa prominenteng angkan ng mga Laurel na kilala sa larangan ng pulitika at serbisyo publiko.

Kinumpirma ng pamilya Laurel ang kanyang pagpanaw sa pamamagitan ng opisyal na pahayag na kanilang inilabas sa social media. Ayon sa kanilang post, “It is with deep affection and grateful faith that we entrust our dear brother, Victor, into the hands of our almighty Lord God, Creator, and Savior.”

Hindi ibinahagi ng pamilya ang sanhi ng pagkamatay ng beteranong aktor, ngunit ang damdaming iniwan niya sa mga taong nakakilala sa kanya ay tila hindi kailanman maglalaho.

Sa kanyang mensahe, labis ang pasasalamat ni Lotlot sa kabutihang loob at pagmamalasakit ni Tito Cocoy hindi lamang sa kanya, kundi pati na rin sa kanilang buong pamilya. Aniya, “Rest in peace, beloved brother, mentor, maestro, and friend. You will always have a special place in our hearts.”

“You will be missed, Tito Cocoy,”  ang madamdaming pagtatapos ni Lotlot sa kanyang post.

Marami sa mga tagahanga ng yumaong aktor at ng pamilya de Leon-Aunor ang nagpahayag ng kanilang pakikiramay at paghanga sa lalim ng samahan ng dalawang pamilya. Hindi rin matatawaran ang naiambag ni Cocoy Laurel sa sining ng teatro at musika sa bansa. Isa siyang haligi ng entablado, at inspirasyon sa maraming artistang Pilipino.

Ang alaala ni Cocoy ay hindi lang mananatili sa entablado o sa mga lumang eksena—bagkus ay patuloy na isasapuso ng mga naantig ng kanyang talento, kabaitan, at tunay na pagkakaibigan.