Vice Ganda to ABS-CBN: Nakapirma na ang puso ko dito

 

“Ayoko na lumabas.”

Tiniyak ng Kapamilya host at comedian na si Vice Ganda sa ABS-CBN nitong Miyerkules na wala siyang balak umalis sa kumpanya kahit walang kontrata.

Sa pagpirma niya ng isa pang eksklusibong kontrata sa Kapamilya network, hindi naiwasang maluha ang mata ni Vice habang nagpahayag ng pasasalamat sa ABS-CBN sa paniniwala sa kanya sa paglipas ng mga taon.

Sa "The Unkabogable Day" noong Miyerkules, inamin ng "It's Showtime!" host na nagtatrabaho siya sa ABS-CBN nang walang kontrata nitong mga nakaraang taon.

“Sayang pa 'yung tinta. Kasi nandito naman ako. Hindi natin kailangan ng kontrata. Hindi,”naalala niyang sinabi sa COO ng ABS-CBN para sa Broadcast na si Cory Vidanes.

“Parang nakapirma na 'yung puso ko dito. 'Yung paa ko e nakabaon na dito sa bahay na ito.”

Ayon sa kanya, kontento na siya at ligtas na siya sa kanyang pamilya sa ABS-CBN.

“It's unsafe outside. I'd rather be here inside my home. This is the perfect and safest place for me. Dito sa ABS-CBN, safe na safe ako,”patuloy ng komedyante.

Nagsimulang maluha si Vice nang pasalamatan niya ang ABS-CBN sa pagpili pa rin sa kanya sa kabila ng pagsulpot ng maraming up-and-coming artists sa industriya.

“Ang sarap-sarap lang na pinipili n'yo ako. Salamat po. Salamat sa pagpili n'yo sa 'kin. Ang dami niyo namang pwedeng pagpilian. Ang daming choices and options... sa dami ng mga sumusulpot, umuusbong, na mga bagong nakikilala, pero ako pa rin 'yung gusto niyo,”

“'Yung pintong binuksan niyo sobrang laki nung pinto na 'yun dahil 'yung pinto na 'yun, nagbigay sa napakaraming tao na masilip ako. Nung binuksan niyo 'yung pinto, hindi lang pinto 'yung bumukas, puso ng mga tao. Napapasok nila ako.”

Ang komedyante ay gumawa ng kanyang marka sa industriya nang maging bahagi siya ng noontime show na “It’s Showtime!” mula noong 2009.

Ang kanyang husay sa pagho-host na ipinares sa kanyang nakakatawang mga punchline ay nagbukas ng mas maraming pagkakataon para sa kanya kabilang ang late-night weekend show na “Gandang Gabi, Vice,” “Pilipinas Got Talent,” “Pinoy Boyband Superstar,” at “Idol Philippines.”

Noong 2021, ang host ay tinanghal na Asia’s best entertainment host sa 2021 Asian Academy Creative Awards (AACA) para sa kanyang stint sa community singing game show na “Everybody, Sing.”