Ibinahagi ng beteranong aktor na si John Estrada ang kanyang paghanga sa Kapamilya actor na si Daniel Padilla, sa isang panayam na inilabas sa vlog ng kolumnistang si Dolly Anne Carvajal noong Oktubre 17. Ayon kay John, matagal na niyang hinahangaan si Daniel—hindi dahil sa mga usap-usapang nauugnay ito sa anak niyang si Kaila Estrada, kundi dahil sa magagandang asal at personalidad nito.
Sa naturang panayam, ikinuwento ni John na una pa lang nilang pagkikita ay napansin na niya ang pagiging magalang at mapagpakumbaba ni Daniel. Nagkasama raw sila sa pelikulang "Must Be... Love" noong taong 2013, kung saan nasulyapan niya kung anong klaseng tao si Daniel sa likod ng kamera.
Isa raw sa pinaka-nagustuhan ni John kay Daniel ay ang respeto nito sa mas nakatatandang mga artista. Ayon sa kanya, hindi naging hadlang ang pagiging sikat ni Daniel para mawalan ng respeto sa mga nauna sa kanya sa industriya. Aniya, “Palagi ko nga sinasabi kay Karla [Estrada], ‘Ang galing mong magpalaki ng mga anak mo.’ Kahit superstar si Daniel, nananatili siyang humble.”
Dagdag pa niya, “Alam niya kung paano igalang ang mga nauna sa kanya sa showbiz. Kaya masasabi kong fan ako ni DJ.”
Nang tanungin naman si John kung boto ba siya kay Daniel sakaling magkatuluyan ito at ang kanyang anak na si Kaila, natawa muna ang aktor bago ito sinagot. Hindi niya diretsong sinabi kung aprubado niya ang ideya, pero sinabi niyang sila na raw ang bahala kung saan patutungo ang kanilang relasyon. “Hindi ko alam. Bahala na sila,” sagot niya nang may halong biro.
Kamakailan lang, umugong ang balitang may namumuong espesyal na ugnayan kina Daniel at Kaila. Noong Setyembre, sa isang episode ng “Showbiz Updates” vlog ni Ogie Diaz, binanggit nito na tila may relasyon na nga raw ang dalawa. Bagamat wala pang kumpirmasyon mula sa kampo nina Daniel o Kaila, marami na ang nakapansin sa umano’y closeness ng dalawa sa mga public events at social media interactions.
Sa kabila ng mga espekulasyon, nananatiling tahimik ang kampo nina Daniel at Kaila ukol sa totoong estado ng kanilang relasyon. Subalit, sa mga pahayag ni John, malinaw na wala naman siyang pagtutol kung sakaling totoo man ang mga balita.
Sa industriya ng showbiz, natural na maging sentro ng usapan ang personal na buhay ng mga artista, lalo na’t galing sila sa prominenteng pamilya sa showbiz. Pero tila si John, bilang ama, ay marunong magbigay ng espasyo sa kanyang anak pagdating sa usapin ng pag-ibig. Ang importante raw ay ang pagiging mabuting tao ng sinumang lalapit sa kanyang anak.
Walang komento
Mag-post ng isang Komento
Share your opinion now!