Carlos Yulo umatras sa 2025 SEA Games sa Thailand

 Nagdesisyon ang kilalang Pilipinong gymnast na si Carlos Yulo na hindi muna sasali sa 2025 Southeast Asian Games (SEA Games) na gaganapin sa Disyembre sa bansang Thailand. Ang balitang ito ay kinumpirma mismo ng Gymnastics Association of the Philippines (GAP) sa pamamagitan ng kanilang pangulo na si Cynthia Carrion.

Ang naging dahilan sa pag-atras ng world-class athlete ay may kinalaman sa bagong regulasyon ng host country. Ayon sa patakaran na ipinatutupad ng organizing committee ng SEA Games sa Thailand, bawat gymnast ay papayagan lamang na sumali sa isang individual apparatus event, imbes na makalahok sa iba't ibang kategorya gaya ng nakasanayan sa mga nakaraang edisyon ng palaro.

Sa pahayag ni Carrion, sinabi niyang personal siyang kinausap ni Yulo upang ipaalam ang kaniyang desisyon na hindi muna lumaban ngayong taon. Ipinahayag daw ng atleta na nais niyang bigyang-daan ang kaniyang mga kasamahan sa national team para makaranas ng kompetisyon sa international stage at magdala ng karangalan sa bansa.

Bagama't ikinalungkot ng ilang fans ang hindi paglahok ni Yulo, sinabi ni Carrion na buo ang suporta ng GAP sa desisyon ng atleta, dahil ito ay nagpapakita ng tunay na sportsmanship at malasakit sa kapwa atleta.

 “Alam niyang hindi siya makakalaban ng full potential kung isang event lang, kaya imbes na ipilit, pinili niyang bigyang-laya ang iba na makapag-perform,” ani Carrion sa panayam.

Sa loob ng ilang taon, naging isa si Carlos Yulo sa mga mukha ng tagumpay sa larangan ng gymnastics para sa Pilipinas. Ilan sa kanyang pinakamalalaking tagumpay ay ang pagkakapanalo ng gold medal sa World Artistic Gymnastics Championships, at ang pag-uwi ng maraming medalya mula sa mga SEA Games at Asian Games.

Ngunit ngayong taon, mas pinili niya ang pagkakataong magbigay-daan sa mga bagong miyembro ng koponan, upang sila rin ay mabigyan ng exposure at karanasang lumaban sa international level.

Maraming netizens ang nagpahayag ng respeto at paghanga sa kanyang hakbang. Sa social media, umani ng papuri si Yulo sa pagiging “selfless” at sa pagkakaroon ng tunay na diwa ng pagiging isang atleta.

Bagama't hindi sasabak si Yulo sa SEA Games, hindi ibig sabihin nito'y huminto na siya sa training. Patuloy pa rin siyang naghahanda para sa mas malalaking kompetisyon tulad ng World Championships at mga qualifying events para sa Olympics. Ayon sa kanyang kampo, nakatuon na ngayon si Carlos sa mga events kung saan mas mailalabas niya ang kanyang buong kakayahan.