Rufa Mae Quinto Iginiit Wala Pang Nakuha Maski Singko Sa Pagkawala ng Mister na si Trevor

 Sa gitna ng mga usap-usapan tungkol sa pagpanaw ng kanyang asawa na si Trevor Magallanes, mariing nilinaw ni aktres at komedyanteng si Rufa Mae Quinto na hindi pa niya natatanggap ang mga death benefits mula sa pamahalaan o sa mga kaukulang ahensya. Ito ang kanyang pahayag sa pinakahuling vlog niya sa YouTube kung saan tinalakay niya ang mga lumalabas na balita tungkol dito.

Ani Rufa Mae, bagama’t alam niya na may karapatan silang tumanggap ng death benefits, hanggang ngayon ay wala pa siyang natatanggap na kahit na maliit na halaga. Ayon sa kanya, ito ay dahil sa mahabang proseso ng aplikasyon at iba pang mga requirement na kailangang pagdaanan bago maipasa ang mga pondo.

“Sa totoo, wala pa akong nakuha kahit singko, wala pa ako nakukuha kahit magkano dahil wala pa. Maraming proseso ‘yan, may application form, may mga schedule, at hindi isang bagsak ang bigay,” paliwanag niya.

Binigyang-diin ni Rufa Mae na hindi niya talaga iniisip ang mga financial na benepisyo dahil sapat ang kanyang kakayahan para buhayin ang sarili niya at ang kanilang anak. Naniniwala siya na ang pinakamahalaga ay ang responsibilidad niya bilang isang ina na siguraduhing maayos ang kalagayan ni Athena, ang kanilang anak.

"Actually, hindi ko iniisip ‘yun, kaya kong buhayin sarili ko at ang anak ko. Yun naman talaga ang pinaninidigan ko kahit kailan," dagdag pa niya.

Kasabay nito, pinabulaanan din niya ang mga kumakalat na tsismis na ang pera raw ang naging sanhi ng kanilang mga problema sa relasyon ni Trevor bago ito pumanaw. Ayon sa kanya, simple lamang ang kanilang buhay at hindi sila nagkaroon ng anumang isyu tungkol sa pera.

 “Kaya ‘yung nag isip na nagkupit ako or nagkubra ng pera or nag-withdraw sa bank account, eh una mag-asawa po kami. Hindi kami nagkaproblema sa pera kahit na kailan kasi simple lang ang buhay namin – kumain ng masarap, mabili ‘yung gusto namin. Wala naman kaming gustong gawin na magpumilit ng gastos tapos hindi namin kaya. Wala kaming withdrawal na nakukuha, wala akong pera kahit magkanong nakukuha. Wag n’yong isipin ‘yan,” linaw ni Rufa Mae.

Bukod dito, nagpasalamat ang aktres sa pagmamahal at respeto na ipinakita ng kanyang yumaong asawa sa kanilang pagsasama. Ayon sa kanya, bago pumanaw si Trevor, nagkaayos sila at nagkasundo na unahin ang kapakanan ng kanilang anak.

“Nagtrabaho siya nang husto, naging pulis pa para matiyak ang mga benepisyo namin. Plano niya talaga na hanggang sa pagtanda ni Athena, may sapat siyang maiawan para sa pag-aaral at pangangailangan niya,” sabi ni Rufa Mae.

Dagdag pa niya, isa rin sa dahilan kung bakit pinili niyang makasama si Trevor ay dahil nakita niya ang malasakit nito sa kanilang pamilya.

“Hanggang sa huli, ang aking asawa ang nag-ayos ng lahat para sa akin at sa anak namin. Iyon ang dahilan kung bakit siya ang aking naging asawa,” pagtatapos niya.

Sa kabila ng matinding pagsubok, ipinakita ni Rufa Mae na nananatili siyang matatag at positibo para sa kinabukasan ng kanilang anak. Patunay ang kanyang mga salita na kahit may mga pagsubok na dumarating, ang tunay na pagmamahal at responsibilidad bilang isang magulang ay nananatiling pinakamahalaga.