Piolo Pascual, Hindi Na Nanahimik Sa Talamak Na Korapsyon Sa Bansa

 Hindi napigilan ni Piolo Pascual ang kanyang pagkadismaya sa mga ulat ng korapsyon sa pamahalaan, lalo na’t isa siya sa mga pinakamalalaking nagbabayad ng buwis sa bansa. Ayon sa aktor, labis ang kanyang panghihinayang na makita ang perang mula sa buwis ng mga mamamayang Pilipino na napupunta lamang sa maling paggamit, gaya ng marangyang pamumuhay at pagbibiyahe ng ilang opisyal.

Sa panayam ng ilang miyembro ng media, tahasang sinabi ni Piolo na ipinagdarasal niya na sana ay mapanagot ang mga taong may kinalaman sa anomalya sa pamahalaan.

“Ipinagdadasal ko talaga na sana makulong o managot ‘yung mga dapat managot para naman kahit papaano, magkaroon tayo ng kapayapaan at muling tiwala sa gobyerno at sa ating bayan. Hindi ito tungkol sa ibang tao, kundi para talaga ito sa kapakanan ng Pilipinas,” ani Piolo.

Binanggit din ng aktor na matagal na siyang nagbabayad ng malaking halaga ng buwis, at sa kabila nito, wala pa siyang natatanggap na tax refund. Ngunit aniya, patuloy pa rin siyang sumusunod sa batas at sa mga alituntunin bilang isang responsable at kilalang personalidad.

“Wala nga tayong tax refund, pero wala, you have to abide especially that you’re in the business. Puwede kang pagdiskitahan, puwede kang i-audit… taxpayer ka pa, no matter what happens,” dagdag niya.

Bagamat may halong biro ang ilang bahagi ng kanyang pahayag, kitang-kita ang seryosong mensahe sa likod ng kanyang mga salita. Inilahad ni Piolo ang pangamba at pagkadismaya hindi lamang para sa sarili, kundi para sa karaniwang Pilipino na apektado ng kapabayaan sa mga proyekto ng gobyerno tulad ng flood control systems.

Inilahad din ng aktor na hindi siya perpekto, pero patuloy siyang ginagabayan ng konsensya at malasakit sa kapwa, lalo na’t alam niyang malaki ang tiwala ng publiko sa kanya bilang artista at bilang mamamayan.

"At the end of the day you have this flood control project and see all your fellowmen having a hard time… Sana magkaroon ng konsensya ‘yung mga taong involved kasi nakakahiya, nakakahiya talaga. Saan ka ba dadalhin ng pera mo? Sapat ay sapat na, huwag mo nang nakawan ‘yung taong naghihirap na nga,” dagdag pa niya.

Sa kanyang mga sinabi, malinaw na si Piolo Pascual ay isa sa mga personalidad na hindi natatakot ipahayag ang kanyang saloobin sa mga isyung pambansa, at isa ring paalala na ang pagsunod sa batas ay hindi sapat kung patuloy namang may mga taong nagsasamantala sa posisyon at kapangyarihan.