Isang nakakakilig at di-inaasahang rebelasyon ang ibinunyag ni Kevin Dasom sa kanyang pag-guest sa The Boobay and Tekla Show kasama si Herlene Budol nitong Linggo, Setyembre 14. Sa isang segment ng programa kung saan sunod-sunod ang mga maiinit na tanong, hindi na naiwasan ng dalawa ang maungkat ang tunay na estado ng kanilang relasyon.
Sa gitna ng usapan, diretsahang tinanong nina Boobay at Tekla ang dalawa kung may namamagitan na nga ba sa kanila. Dito na ibinunyag ni Kevin na seryoso na siyang nanliligaw kay Herlene.
Hindi lang basta-basta ang kanyang pahayag. Ayon kay Kevin, hindi lamang si Herlene ang kanyang pinupusuan, kundi pati na rin ang mga mahal nito sa buhay. Ayon sa kanya, bahagi ito ng kanyang paraan upang ipakita ang sinseridad at tapat niyang intensyon sa dalaga.
“Hindi lang si Herlene ang nililigawan ko,” ani Kevin. “Not just to Herlene, but to her parents as well, to her friends, and family, to everyone close to Herlene. And everybody that is important to Herlene in her life kasi Herlene has a few friends and a few important people, but they mean a lot to her.”
Ipinaliwanag pa ng foreigner na bagamat limitado lang ang bilog ng mga kaibigan at inner circle ni Herlene, naniniwala siyang mahalagang kilalanin at pahalagahan ang mga ito upang tunay na maipadama ang kanyang intensyon.
“It looks like a lot and it looks like a little, depending on what your perspective is. But if it’s a little, it means a lot, and if it’s a lot then it means a lot more,” dagdag pa niya.
Samantala, si Herlene naman ay inamin na hindi siya sanay sa ganitong klaseng panliligaw, lalo’t ito ang unang pagkakataon na ligawan siya ng isang banyaga. Ayon sa kanya, nagsimulang manligaw si Kevin noong buwan pa ng Enero, kaya’t ilang buwan na rin silang madalas magkausap at magkasama sa mga okasyon.
“Nagulat din ako noong una,” pag-amin ni Herlene. “Ibang-iba kasi ang approach niya. Gentle, sincere, at talagang gusto niyang kilalanin hindi lang ako kundi pati ang buong pagkatao ko.”
Hindi man diretsahan sinabi kung may "yes" na ba mula kay Herlene, halata sa kanyang mga ngiti at kilos na malapit na ang loob niya kay Kevin. Inamin rin niya na masaya siya sa atensyong natatanggap mula rito, at sa effort na ginagawa ng binata para sa kanya at sa mga taong mahal niya.
Marami namang netizens ang kinilig sa kanilang palitan ng salita at hindi naiwasang magbigay ng suporta sa posible nilang pag-iibigan. Marami ang nagsabing bagay na bagay sila at nakakatuwa raw makita ang isang seryosong manliligaw na handang kilalanin ang buong mundo ng kanyang nililigawan.
Habang wala pang opisyal na label ang kanilang ugnayan, tila hindi na malayong maging opisyal ang kanilang relasyon kung magpapatuloy ang magandang samahan nila.
Walang komento
Mag-post ng isang Komento
Share your opinion now!