Nagpakulo ng diskusyon sa social media ang Kapuso actor na si Alden Richards matapos nitong ibahagi ang kahulugan ng salitang “kuracaught” — isang slang na tumutukoy sa isang opisyal o taong nasangkot at nahuling aktwal na gumagawa ng katiwalian o korapsyon.
Sa kanyang post, isinulat ni Alden ang depinisyon ng “kuracaught” bilang: “corrupt official or individual caught red-handed in unabashed graft and corruption.”
Bagama’t walang direktang binanggit na pangalan o partikular na politiko, marami sa kanyang mga tagasubaybay ang mabilis na naka-ugnay ng post sa isang mambabatas na kamakailan lamang ay nasangkot sa kontrobersyal na isyu ukol sa umano’y "kickback" mula sa flood control projects.
Mabilis kumalat ang post ni Alden at umani ito ng samu’t saring reaksyon mula sa netizens. Marami ang natuwa at pumalakpak sa tila patama nitong pahayag, habang ang ilan naman ay natawa sa mga biro at komentong sinundan nito.
“Nice one, Alden!” ani ng isang tagasuporta na tila tuwang-tuwa sa pagiging mapanlikha ng aktor. May isa pa ngang nagbiro ng, “Hala siya, magpa-fan war na naman dito,” na tila inaasahan na ang posibleng init ng palitan ng opinyon sa mga komento.
Sa comment section, mas lalo pang naging masaya ang usapan. Ilan sa mga netizens ay nagpahayag ng kanilang opinyon sa mas nakakatawang paraan, gamit ang mga kasabihang Pilipino gaya ng, “Bato-bato sa langit, ang tamaan guilty!” May nagkomento rin ng, “Shots fired! Hahaha,” na para bang sinasabing direkta ang patama ni Alden kahit wala namang pinangalanan. Isa pa nga ay bumanat ng, “Flood gave me you… LOL,” bilang pagtukoy sa isyu ng flood control scandal.
Dahil sa viral post, naging inspirasyon pa ito sa ibang followers na lumikha ng sarili nilang bersyon ng salitang “kuracaught.” May isang nagbiro pa na dapat daw tawagin ang ibang kurakot na “Kuracutie,” isang pagsasanib ng salitang "kurakot" at "cutie," na tila isang sarcastic na biro.
Bagama’t hindi tahasang nagsalita si Alden tungkol sa pulitika, tila hindi na rin kailangan ng mas malinaw na pahiwatig para sa karamihan. Para sa iba, malinaw na ang mensahe — isang banayad pero matalim na komentaryo sa kasalukuyang estado ng ilang mga opisyal sa pamahalaan.
Marami rin ang humanga sa pagiging matapang ni Alden sa pagbabahagi ng opinyon sa gitna ng maingay na usapin. Ayon sa isang netizen, “Minsan kailangan din ng ganitong klaseng tapang, lalo na kung marami na talagang hindi tama.”
Hindi ito ang unang beses na naging vocal si Alden sa mga isyung panlipunan, ngunit kakaiba ngayon ang reaksyon ng mga tao dahil tila natamaan sa "tamang-tama" ang kanyang post sa panahon ng mga umiinit na balita.
Sa huli, nananatiling bukas ang interpretasyon ng publiko sa intensyon ng aktor, ngunit kung pagbabasehan ang mga komento at shares ng kanyang post, malinaw na maraming netizens ang nakarelate — at napangiti — sa kanyang simpleng banat na may malalim na kahulugan.
Walang komento
Mag-post ng isang Komento
Share your opinion now!