Isang mainit na usap-usapan sa mundo ng beauty pageants ang naging biglaang pagbitiw ni Rachel Gupta, ang kinatawan ng India na tinanghal na Miss Grand International 2024. Ang kanyang desisyong isuko ang titulo at korona ay ikinagulat ng marami, lalo na ng mga masugid na tagasuporta ng kompetisyon sa buong mundo.
Sa isang emosyonal na Instagram post, ipinaabot ni Gupta ang kanyang saloobin at paghingi ng paumanhin sa kanyang mga tagasunod. Ayon sa kanya, hindi naging madali ang kanyang desisyong bumitaw sa posisyon, ngunit ito raw ang nararapat para sa kanyang kapakanan.
"To all my supporters around the world: I’m truly sorry if this news has disappointed you. Please know this wasn’t an easy decision, but it was the right one for me," saad ni Gupta sa kanyang post.
"The truth will come out very soon."
"I love you all more than words can express. Thank you for standing by me," aniya pa.
Kasama sa kanyang post ang isang art card na naglalaman ng kanyang opisyal na pahayag. Dito, malinaw na hindi naging magaan ang kanyang karanasan sa likod ng entablado ng Miss Grand International.
Bagama’t sa panlabas ay mukhang masaya at matagumpay, ibinunyag niya ang ilang hindi kanais-nais na pangyayari matapos niyang koronahan noong Oktubre 25, 2024, sa isang engrandeng seremonya sa MGI Hall, Bravo BKK Mall sa Bangkok, Thailand.
Ayon kay Gupta, ang mga sumunod na buwan matapos ang kanyang pagkapanalo ay puno ng pagkadismaya. Inilarawan niya ang kanyang naging karanasan bilang "punô ng mga naputol na pangako, hindi makataong pagtrato, at isang mapanirang kapaligiran" na hindi na raw niya kayang tiisin nang tahimik.
"However, the months following my crowning have been marked by broken promises, mistreatment, and a toxic environment I can no longer endure in silence," pahayag ng Beauty Queen.
Bagamat hindi pa niya inilalabas ang buong detalye ng kanyang mga naging karanasan, nangako siya na magkakaroon siya ng mas malalim na paliwanag sa pamamagitan ng isang video statement. Hiling rin niya na siya'y patuloy na maunawaan ng publiko, at huwag siyang husgahan kaagad. Nanawagan siya para sa empatiya at suporta habang siya ay dumaraan sa mahirap na yugto ng kanyang buhay.
Ang kanyang pagbibitiw ay nagbukas ng mas malawak na diskusyon tungkol sa tunay na kalagayan ng mga beauty queens sa likod ng kamera. Maraming netizens ang nagpahayag ng suporta kay Gupta, sinasabing nangangailangan ng mas transparent at makataong pamamalakad sa mga international pageants. May ilan ding nananawagan sa organisasyon ng Miss Grand International na magbigay ng tugon sa mga ipinahayag ni Gupta.
Sa kabila ng kontrobersya, pinuri pa rin ng marami ang katapangan ni Gupta sa paglalantad ng kanyang saloobin. Para sa kanila, ang pag-alis sa isang prestihiyosong titulo ay hindi kabiguan, kundi isang anyo ng tagumpay sa pagpanindigan sa sariling prinsipyo at kapakanan.
Walang komento
Mag-post ng isang Komento
Share your opinion now!