Nagdulot ng matinding diskusyon sa mundo ng pageantry ang magkakasalungat na pahayag mula kina Rachel Gupta, ang kinatawan ng India na itinanghal bilang Miss Grand International 2024, at ang mismong pamunuan ng Miss Grand International Organization (MGI). Ang isyung ito ay nagsimula nang biglaang ianunsyo ni Gupta sa kaniyang social media account na siya’y kusa umanong nagbitiw sa kanyang titulo, ngunit kasunod nito’y inilabas ng MGI ang opisyal nilang pahayag na nagsasaad na terminated si Gupta sa kanyang tungkulin.
Sa Instagram post ni Gupta, sinabi niyang mahirap para sa kanya ang naging desisyon pero kinakailangan niyang gawin ito.
Ayon sa kanyang pahayag, may mga pangyayaring hindi niya na kayang palagpasin, at sa kabila ng sakit na dulot ng pagbitaw sa korona, kailangan niyang unahin ang kanyang kapakanan at prinsipyo. Ibinahagi rin niya na balak niyang maglabas ng detalyadong paliwanag sa pamamagitan ng isang video upang mas maunawaan ng publiko ang kanyang panig.
Sa parehong post, humingi rin siya ng pang-unawa mula sa mga tagasuporta at nanawagan ng patuloy na suporta sa kanya sa kabila ng kontrobersya.
Subalit taliwas sa kanyang mga pahayag, isang opisyal na anunsyo mula sa MGI ang lumabas na tila nagpapakita ng ibang bersyon ng kwento. Ayon sa dokumento ng Miss Grand International Organization, hindi umano kusang nagbitiw si Gupta, kundi siya ay tinanggal sa puwesto dahil sa mga paglabag sa alituntunin ng kanilang organisasyon.
Nakasaad sa kanilang anunsyo na epektibo agad ang pagtanggal kay Gupta bilang Miss Grand International 2024. Isa sa mga pangunahing dahilan ay ang kanyang umano’y pagkabigong tuparin ang mga tungkulin na nakaatas sa kanya bilang nanalong kandidata.
Bukod pa rito, sinabi rin ng MGI na si Gupta ay lumahok sa mga proyektong panlabas nang walang pahintulot mula sa organisasyon, at tumanggi rin daw ito na dumalo sa isang naka-iskedyul na biyahe patungong Guatemala—isang opisyal na aktibidad na bahagi ng kanyang responsibilidad.
Dahil dito, tuluyan nang binawi ng MGI ang kanyang titulo at ipinag-utos na isauli sa kanilang tanggapan ang korona sa loob ng tatlumpung araw mula sa petsa ng pahayag. Ayon pa sa organisasyon, wala nang karapatang gamitin ni Gupta ang anumang pagkakakilanlan na may kaugnayan sa Miss Grand International 2024.
"The Miss Grand International Organization hereby announces the termination of Miss Rachel Gupta’s title as Miss Grand International 2024, effective immediately."
"This decision follows her failure to fulfill her assigned duties, engagement in external projects without prior approval from the organization, and her refusal to participate in the scheduled trip to Guatemala."
"As a result, the organization has resolved to revoke her title with immediate effect. Miss Rachel Gupta is no longer authorized to use the title or wear the crown associated with Miss Grand International 2024."
"We request that the crown be returned to the MGI Head Office within 30 days from the date of this notice," anila pa.
Mabilis na kumalat ang balita sa social media, at umani ng matinding reaksyon mula sa mga pageant enthusiasts, netizens, at tagasuporta ni Gupta.
Sa comment section ng post ng MGI, makikitang maraming netizens ang bumatikos sa organisasyon. Ilan sa mga ito ay nagsabing tila hindi patas ang naging desisyon ng MGI, habang ang iba naman ay nagpakita ng suporta kay Gupta at hiniling na marinig muna ang buong panig ng dalaga bago husgahan.
Ang pangyayaring ito ay muling nagbukas ng tanong sa kung gaano kalaya ang mga beauty queen matapos nilang manalo. Karaniwan na kasing hindi nakikita ng publiko ang tunay na kalagayan ng mga kandidata matapos silang koronahan. Habang ang glamor ng entablado ay puno ng ngiti at aliw, may mga aspeto pala sa likod nito na hindi nabibigyang pansin—gaya ng pressure, kontrol ng organisasyon, at personal na pakikibaka ng mga beauty queen.
Sa ngayon, hinihintay pa rin ng marami ang mas detalyadong video statement mula kay Gupta upang linawin ang mga alegasyon. Hindi rin malinaw kung may legal na hakbang na isasagawa, lalo na’t tila parehong seryoso ang panig ng magkabilang kampo. Isa lang ang malinaw: ang kaganapang ito ay muling nagpapaalala na ang mundo ng beauty pageants ay hindi palaging kasingkinang ng korona sa ibabaw ng kanilang ulo.
Walang komento
Mag-post ng isang Komento
Share your opinion now!