Maraming netizens ang napaisip at napa-"Another PBB Collab?" matapos mapansin ang pagsasamang muli ng dalawang haligi ng broadcast journalism sa Pilipinas—sina Korina Sanchez-Roxas at Jessica Soho—na parehong namataan sa Vatican City kamakailan.
Itinampok mismo ang tagpo sa opisyal na Facebook page ng programang "Kapuso Mo, Jessica Soho (KMJS)," ang kilalang award-winning public affairs show na pinangungunahan ni Jessica. Agad namang nag-viral ang litrato kung saan makikitang magkasama sina Korina, na ngayo’y anchor sa Bilyonaryo News Channel (dating kilala bilang personalidad ng ABS-CBN), at si Jessica na nananatiling isa sa mga pangunahing mukha ng GMA News and Public Affairs.
Ang simpleng larawan ay umani ng samu’t saring reaksiyon at espekulasyon mula sa mga tagasubaybay. Naroon ang mga komentong pabiro ngunit puno ng paghanga, gaya ng:
“PBB collab next edition na ba ituuu?”
“HANDA NA BA KAYO?! I-KMJS NA 'YAN!”
at “Two legends, one location!”
May isa rin na nagsabi: “Both started as Sunday night magazine shows and for the last two decades they became part of Pinoy pop culture… Is this a sign of a collab?”
Kasama rin sa caption ng nasabing post ang pahayag na nagsasabing ang dalawa ay naroon upang mag-cover ng isa sa pinakamahalagang kaganapan sa Simbahang Katolika—ang papal conclave, kung saan pipiliin ang susunod na Santo Papa na papalit kay Pope Francis, na pumanaw kamakailan. Bilang mga beteranong mamamahayag, hindi na ikinagulat ng marami na naroon sila para sa ganitong klaseng internasyonal na pagtutok.
Ang hindi inaasahang pagtatagpong ito ay hindi nakaligtas sa mga mapanuring mata ng mga netizen, lalo’t matagal nang kinikilala sina Jessica at Korina bilang magkatunggali sa parehong larangan at time slot ng kani-kanilang mga programang pampubliko. Matatandaang si Korina ay dating bahagi ng ABS-CBN kung saan pinangunahan niya ang programang “Rated K,” habang si Jessica naman ay patuloy na naglilingkod bilang host ng “KMJS” sa GMA Network. Sa loob ng maraming taon, sabay umere ang dalawang palabas tuwing Linggo ng gabi mula 2012 hanggang 2019—isang kompetisyong pinag-usapan at sinubaybayan ng maraming manonood.
Ngunit ang pagkikita ng dalawang beterana sa isang malayong lugar tulad ng Vatican ay tila naging simbolo para sa maraming netizen—na sa kabila ng pagiging bahagi ng magkalabang istasyon, maaaring magtagpo ang dalawang respetadong mamamahayag sa iisang layunin: ang paghahatid ng totoo, tapat, at makabuluhang balita sa publiko.
Isa sa mga komentong umani ng maraming “likes” ay nagsasabing, “This proves how journalists, regardless of the competing networks they represent, can unite in the pursuit of truth and accuracy.”
Hindi pa malinaw kung may pinaplano nga bang proyekto o panandaliang pagkikita lang ito sa iisang assignment, pero para sa maraming Pilipino, sapat na ang iisang litrato ng dalawang iniidolong mamamahayag upang maghatid ng inspirasyon at pag-asa sa media landscape ng bansa. Isa itong paalala na higit sa kompetisyon, ang integridad sa propesyon at layunin ng paghahatid ng impormasyon ang mas mahalaga.
Walang komento
Mag-post ng isang Komento
Share your opinion now!