Humarap sa kontrobersya ang komedyanteng si Tuesday Vargas matapos siyang akusahan ng pagiging suplada umano sa ilang kapwa Pilipino na lumapit sa kanya para magpa-picture habang siya ay nasa Hong Kong Disneyland. Ang alegasyon ay unang lumabas sa isang viral post sa Reddit, kung saan sinabi ng nag-post na tila hindi maganda ang naging pakikitungo ni Tuesday sa ilang kababayan na nais lamang ng litrato kasama siya.
Sa halip na manahimik, piniling sagutin ni Tuesday ang isyu sa pamamagitan ng sunud-sunod na Facebook posts. Ayon sa kanya, wala siyang tinanggihan na lumapit sa kanya ng maayos. Sa katunayan, ginawa raw niya ang lahat upang pagbigyan ang mga taong humiling ng litrato sa maayos na paraan.
“Bakit po may mga ganitong tao sa mundo? Lahat po ng nag-ask nicely sa akin ay pinagbigyan ko magpa-picture. Nakakalungkot po na may ganitong mapaggawa ng kwento,” pahayag ni Tuesday sa kanyang post.
Dagdag pa niya, hindi niya maalala na may nasungitan o tinarayan siya sa araw na iyon. Ipinaliwanag din ng aktres na napakainit at masikip ang lugar, kaya natural lamang na hindi siya palaging nakangiti o masigla. Gayunpaman, iginiit niyang hindi niya sinadyang magpakita ng masamang pag-uugali sa sinuman.
“Wala akong maalala na nang-irap ako o nagtaray sa kahit sinong maayos na lumapit. Please lang po, huwag naman po tayong ganyan. Nakakasakit po kayo ng damdamin,” dagdag pa niya.
Partikular na binigyang-pansin ni Tuesday ang nag-post sa Reddit. Ayon sa kanya, kung talagang may reklamo ang tao, sana ay nilapitan siya ng personal sa halip na ikuwento ito sa social media. Para kay Tuesday, mas makabubuti sana kung harapan siyang kinausap upang maipaliwanag niya ang kanyang panig at maiwasan ang hindi pagkakaintindihan.
“Kung talagang matapang ka, sana sinabi mo sa akin doon mismo ang saloobin mo at di ka nagtago sa Reddit,” matapang na sagot ni Tuesday.
Ayon pa sa Reddit user, nakita raw nila si Tuesday na “umirap” sa isang bata at sa lola nito na lumapit para magpa-picture. Sinabi rin umano ni Tuesday na, “Kaya nga ako andito para mag-relax,” bilang pagtanggi sa photo request. Inilarawan pa ng netizen si Tuesday bilang masayahin online ngunit kabaligtaran daw sa personal.
Mariin naman itong pinabulaanan ni Tuesday. Aniya, tulad ng ibang turista, nais lang niyang magpahinga at mag-enjoy. Hindi raw tama na husgahan siya base sa iisang obserbasyon o tsismis, lalo na’t galing pa sa kapwa Pilipino.
“Tahimik lang akong nakapila at nag-eenjoy kagaya ng lahat,” paliwanag niya.
Sa huli, ipinaabot ni Tuesday ang kanyang sama ng loob, hindi dahil sa simpleng bintang, kundi sa katotohanang galing pa sa kapwa Pilipino ang panghuhusga.
“Sinusubukan kong maging mabuting tao parati pero ang dami na kapwa ko Pilipino pa ang yumuyurak sa pagkatao ko,” pagtatapos ni Tuesday.
Walang komento
Mag-post ng isang Komento
Share your opinion now!