Ogie Diaz Ipinagtanggol Si Heart Evangelista, Matagal Nang Mayaman Hindi Pa Man Sila Kasal Ni Chiz Escudero

 Nagbigay ng kaniyang opinyon ang kilalang showbiz insider na si Ogie Diaz patungkol sa kaliwa’t kanang batikos na tinatanggap ngayon ng Kapuso fashion icon at aktres na si Heart Evangelista. Ang naturang pambabatikos ay nagsimula matapos madawit ang pangalan ng kanyang mister na si dating Senate President Francis "Chiz" Escudero sa kontrobersiyang may kinalaman sa mga flood control project na umano’y may anomalya.

Sa isang pagdinig ng Senate Blue Ribbon Committee noong Setyembre 25, binanggit ng dating DPWH Undersecretary na si Roberto Bernardo ang pangalan ni Escudero. Gayunman, agad itong pinabulaanan ni Escudero at mariing itinanggi ang anumang kaugnayan sa nasabing usapin, sabay sabing walang basehan ang mga paratang.

Sa pinakabagong episode ng “Ogie Diaz Showbiz Updates” na umere noong Setyembre 30, tinalakay nina Ogie at ng kanyang mga co-host kung paano tila naging punching bag ng mga netizen si Heart. Ayon sa kanila, bugbog-sarado na raw ang aktres sa social media, kung saan tinatawag pa siyang “nepo wife” — isang banat na tumutukoy sa diumano’y paggamit niya ng koneksyon para sa karangyaan. Kabilang sa mga pinag-iinitan ay ang kanyang pagbibida ng marangyang lifestyle online.

Isa rin sa mga naging sentro ng diskusyon ang isang mamahaling singsing na regalo umano sa kanya ni Sen. Chiz, na ayon sa tsismis ay may halagang nasa ₱57 milyon. Ngunit ani Ogie, bago pa man naging asawa ni Escudero si Heart, mayaman na talaga ang aktres.

Ipinunto ni Ogie na galing sa isang kilalang pamilya ng negosyante si Heart. Ang mga magulang nito, sina Rey at Cecilia Ongpauco, ay may-ari ng mga establisyimentong kabilang sa sikat na Filipino restaurant chain na Barrio Fiesta. Bukod pa rito, ayon sa mga ulat, pagmamay-ari rin ng kaniyang ina ang isang malawak na sugar plantation sa Camarines Sur.

"Hindi sa pinagtatanggol ko si Heart ha," paglilinaw ni Ogie, “pero dapat ding bigyang-linaw na bago pa man siya naging asawa ni Sen. Chiz, may sarili na siyang yaman.”

Dagdag pa ni Ogie, maliban sa yaman ng kanyang pamilya, masipag din daw talaga si Heart. Matagal na siyang nagtatrabaho sa industriya ng showbiz — nagsimula pa noong siya’y 13 taong gulang. Ngayon, isa siya sa mga pinakakilalang endorser sa bansa, na may tinatayang 48 brand endorsements.

Ibinunyag din ni Ogie na batay sa kanyang narinig mula sa mga nasa industriya, ang talent fee ni Heart kada endorsement ay maaaring umabot ng ₱8 hanggang ₱15 milyon kada taon. Hindi pa raw kasama rito ang kanyang kinikita mula sa pagbebenta ng kanyang mga paintings, na may matataas ding halaga.

Kaya’t ayon kay Ogie at sa kanyang co-hosts, walang dapat ikagulat kung bakit kaya ni Heart na bumili ng mga designer items o mamuhay nang marangya — ito ay bunga raw ng kanyang sariling pagsusumikap at hindi pera ng taong bayan.

Sa isang live video kamakailan, sinagot rin mismo ni Heart ang mga paratang. Aniya, malinaw ang konsensiya niya pagdating sa kanyang mga ari-arian at luho. Ipinunto niyang hindi kailanman ginamit ang pera ng gobyerno para sa kanyang mga personal na gamit at ang lahat ng kanyang pag-aari ay galing sa sarili niyang kita at talento.