Sa gitna ng mga maiinit na balita tungkol sa diumano’y pagnanakaw sa kaban ng bayan, muling naging boses ng masa ang komedyanteng si Vice Ganda. Sa isang episode ng noontime show na It’s Showtime na umere nitong Lunes, Setyembre 15, naglabas ng saloobin si Vice hinggil sa patuloy na pagkolekta ng buwis sa kabila ng mga isyung kinakaharap ng gobyerno.
Ayon kay Vice, sa gitna ng alegasyon ng kurapsyon at hindi malinaw kung saan napupunta ang perang kinokolekta mula sa buwis ng mamamayan, tila hindi makatarungan na patuloy pa ring patawan ng obligasyong magbayad ang mga Pilipino.
“Sa totoo lang, dapat hindi muna tayo sinisingil ng buwis ngayon,” ani Vice. “Paano naman ‘yun? Kinuha na nga ‘yung pera namin, tapos kami pa rin ang kailangang magbayad? Parang hindi tama.”
Ipinanukala ng komedyante ang ideya ng isang pansamantalang "tax holiday" o pagtigil muna sa pagkolekta ng buwis mula sa mga karaniwang mamamayan, habang hindi pa naaayos ang mga isyu ng katiwalian sa loob ng gobyerno. Para kay Vice, ito ay isa lamang makatarungang hakbang upang maprotektahan ang interes ng publiko.
“Dapat nga hindi muna tayo magbayad ng tax, para sa akin ha. ‘Di ba? Ako, parang tingin ko, hindi puwedeng ninakaw niyo ‘yung tax namin, tapos magbabayad pa din kami. Ibalik niyo muna ‘yung ninakaw niyo sa amin,” dagdag pa niya.
Bukod pa rito, hinamon din ni Vice Ganda ang mga nasa kapangyarihan na ipakita ang tunay na malasakit sa mga Pilipino. Aniya, kung tunay ang pagmamahal ng pamahalaan sa sambayanan, dapat ay mayroong konsensya at konsiderasyon sa nararamdaman ng mga ordinaryong tao.
“Kung talagang mahal ng mga nasa gobyerno ang mga Pilipino, maglambing naman kayo. Pinanakaw niyo ang pera namin e ‘di ba? ‘Wag niyo muna kaming pagbayarin. Hangga’t ‘di naaayos.” aniya pa.
Ang pahayag ni Vice Ganda ay mabilis na umani ng samu’t saring reaksyon mula sa publiko. Marami ang nagpahayag ng suporta sa komedyante, na matapang na naglabas ng kanyang opinyon sa kabila ng sensitibong kalagayan. May ilan ding nagsabing ito ay sumasalamin sa sama ng loob at pagkadismaya ng maraming Pilipino na araw-araw nagsusumikap pero tila hindi nakikinabang sa buwis na kanilang ibinabayad.
Sa social media, umani ng papuri si Vice Ganda dahil sa kanyang pagiging prangka at sa paggamit ng kanyang plataporma upang magsalita para sa masa. May mga netizens na nagkomento na ang kanyang panawagan ay sumasalamin sa hinaing ng mga manggagawa at karaniwang mamamayan na patuloy na kinakaltasan ng buwis, kahit hindi malinaw kung saan napupunta ang mga ito.
Samantala, nananatiling tahimik ang ilang sangay ng gobyerno ukol sa panawagan ni Vice. Wala pa ring opisyal na pahayag mula sa mga kinauukulan kung may posibilidad bang maisakatuparan ang mungkahing “tax holiday,” lalo na kung ito ay magiging paraan upang maibalik ang tiwala ng publiko sa sistema.
Sa dulo ng kanyang pahayag, iginiit ni Vice Ganda na ang kanyang panawagan ay hindi para lang sa kanyang sarili, kundi para sa bawat Pilipinong nararamdaman ang bigat ng responsibilidad sa gitna ng mga balitang pagkakalustay ng pondo ng bayan.
“Hindi lang ito para sa akin, para ito sa lahat ng Pilipino. Sana marinig tayo,” pagtatapos niya.
Walang komento
Mag-post ng isang Komento
Share your opinion now!