Mga Artistang Nangagalaiti sa Finger Heart Ni Sarah Discaya

 Umani ng matinding batikos mula sa ilang personalidad sa showbiz si Sarah Discaya, ang kontrobersyal na kontratista na nasasangkot sa umano'y maanomalyang proyekto sa flood control. Ito ay matapos kumalat ang isang video kung saan makikitang nakangiti si Discaya at nagbigay pa ng finger-heart sign sa harap ng mga mamamahayag, sa halip na sagutin ang mga tanong tungkol sa kinahaharap niyang kaso ng korapsyon.

Ang naturang video ay kuha matapos ang kanyang pagharap sa Department of Justice (DOJ) noong Sabado. Sa halip na magpakita ng seryosong disposisyon o magsalita hinggil sa mga akusasyon laban sa kanya at sa kanyang asawa, mas pinili ni Discaya na ngumiti, gumawa ng Korean-style finger heart, at magbiro pa sa media:

“Gandahan n’yo ’yung memes ko.”

Dahil dito, hindi napigilan ng ilang celebrities na ipahayag ang kanilang pagkadismaya at pagkagalit.

Isa sa mga unang nagpahayag ng saloobin ay si Rocco Nacino, na hindi na nagpaligoy-ligoy sa kanyang komento sa isang viral post. Aniya,

“Walang konsensya. Itim ng ugali kasing itim ng nunal niya.”

Matapang ang aktor sa pagtuligsa sa tila kawalang-respeto ng kontratista sa kaseryosohan ng sitwasyon.

Sumunod na nagpahayag ng galit ay ang komedyanteng si Pokwang, na may maikli ngunit matinding komento:

“Baliw!!!”

Bagama’t maikli, malinaw ang intensyon ng kanyang pahayag — hindi katanggap-tanggap ang ikinilos ni Discaya sa publiko.

Samantala, sa mas seryosong tono, idinaan ni Bela Padilla ang kanyang saloobin sa pamamagitan ng Instagram Stories. Ayon sa aktres:

“She’s not taking herself, the magnitude of what she and her husband did on all of us, seriously. Is this kind of behavior acceptable to you?”

Malinaw na para kay Bela, ang kilos ni Discaya ay isang anyo ng hindi pagrespeto sa publiko at sa batas.

Ayon sa ulat, ang video ay kuha habang papalabas ng DOJ si Sarah at ang kanyang asawang si Curlee Discaya, na kapwa sangkot sa iniimbestigahang anomalya kaugnay ng ilang flood control projects. Ang mag-asawa ay dumalo sa DOJ upang magsumite umano ng karagdagang ebidensya na bahagi ng kanilang testimonya. Sa kabila ng grabeng alegasyon, humihingi rin sila ng proteksyon mula sa Witness Protection Program ng gobyerno.

Ang kilos ni Sarah ay tila salungat sa inaasahang kilos ng isang taong nasasangkot sa matinding isyu ng korapsyon. Sa halip na ipakita ang pag-aalala, pagsisisi, o kahit man lang respeto sa mga katanungan ng media at sa taumbayan, tila mistulang biro pa ang dating ng kanyang kilos.

Dahil sa kanyang asal, muling naungkat ang isyu ng pananagutan ng mga nasa kapangyarihan, at ang tila kawalan ng takot ng ilan sa epekto ng kanilang mga ginagawa sa sambayanan. Marami sa netizens at kilalang personalidad ang nagsabing ang ganitong uri ng pag-uugali ay hindi dapat palampasin, lalo’t may implikasyon ito sa integridad ng hustisya at pamahalaan.

Habang nagpapatuloy ang imbestigasyon, patuloy din ang pagbabantay ng publiko sa magiging resulta ng kaso — at kung mananagot ba ang mga tunay na may sala, gaano man sila kayaman, kapangyarihan, o kaimpluwensya.