Tila hindi na napigilan ng aktor na si Zanjoe Marudo ang kanyang sarili at nagsalita na hinggil sa paulit-ulit na tanong ng ilang netizens tungkol sa anak nila ng aktres na si Ria Atayde. Mula nang isilang ni Ria ang kanilang panganay, marami na ang nagtatanong kung bakit hanggang ngayon ay hindi pa rin ipinapakita sa publiko ang mukha ng kanilang anak.
Matatandaan na kahit ilang larawan na ang ibinahagi ng mag-asawa sa kani-kanilang social media accounts, nananatiling hindi kita ang mukha ng kanilang supling. Dahil dito, naging usap-usapan sa online world ang tila pagiging pribado ng mag-asawa pagdating sa kanilang anak.
Sa panayam kay Zanjoe sa pinakabagong episode ng programang "Ogie Diaz Inspires" noong Sabado, Hunyo 21, ipinaliwanag ng aktor kung bakit pinipili nilang huwag munang isapubliko ang mukha ng bata. Ayon sa kanya, wala pa namang saysay para sa bata ang exposure sa social media sa murang edad nito.
“Wala pa siyang kamuwang-muwang sa mga nangyayari. Baby pa siya. Para saan ba ‘yung social media sa kanya ngayon?” wika ni Zanjoe, na halatang seryoso sa kanilang desisyong ito.
Dagdag pa ng aktor, isa rin sa mga pangunahing dahilan kung bakit nila pinipigilang ilantad sa publiko ang kanilang anak ay ang kaligtasan nito.
Aniya, “At ‘yon nga, social media toxic din ‘di ba. Ang daming puwedeng mangyari. Unang-una ‘yong safety ng baby.“
Gayunman, nilinaw ni Zanjoe na hindi nila itinatago ang bata. Sa katunayan, kapag nasa labas sila o namamasyal sa mall, madalas daw niyang ipinapakita ang anak sa mga malalapit na kaibigan o tagahanga na nais siyang makita.
“Kapag may kaibigan akong nakita o fans or ano, ‘Uy, kumusta baby mo? Patingin naman. Pinapakita ko sa kanila. Hindi ko siya tinatago,” ani Zanjoe.
Bukod pa rito, hindi na raw niya kailangang pagsabihan ang mga taong huwag kuhanan ng larawan o video ang kanilang anak. Ang obserbasyon niya, kapag bukal sa loob nilang ipinapasilip ang bata, mas nirerespeto raw sila ng mga tao.
“Hindi ko na kailangan pang sabihin na huwag kuhanan. Parang mas naiintindihan nila kapag kusa mong pinapakita. May respeto pa rin,” dagdag pa niya.
Sa huli, ipinahiwatig ni Zanjoe na nais lamang nilang protektahan ang kanilang anak sa maagang paglalantad sa mundo ng social media. Para sa kanila ni Ria, darating din ang tamang panahon na ipapakilala nila nang buo ang kanilang anak sa publiko — ngunit sa panahong handa na ang bata at hindi lang para sa kapritso ng online audience.
Walang komento
Mag-post ng isang Komento
Share your opinion now!