Relasyon nina Ruffa Gutierrez at Herbert Bautista, Dumaraan sa Pagsubok

 

Sa isang emosyonal ngunit matapat na panayam sa programang Fast Talk with Boy Abunda nitong Huwebes, ibinahagi ng aktres na si Ruffa Gutierrez ang kasalukuyang estado ng kanyang relasyon sa dating aktor at pulitiko na si Herbert Bautista. Ayon sa aktres, hindi sila kasalukuyang nagkakausap at dumaraan sila sa isang yugto ng hindi pagkakaunawaan o tinawag niyang "bump in the road."

“We’re going through a bump right now and we’re not speaking,” pagbubunyag ni Ruffa kay Boy Abunda. Dagdag pa niya, wala pang kasiguraduhan kung malalampasan nila ang hamong ito o kung tuluyan na silang maglalayo ng landas. “Let’s see if that bump will last or we’ll speak again. I don’t know,” ani Ruffa, na tila bukas pa rin sa posibilidad ng pagkakaayos sa hinaharap.

Ipinunto rin ng aktres na maaaring ang pansamantalang espasyong ito ang magbukas ng mas malawak na pag-unawa sa kanilang dalawa. Ayon kay Ruffa, limang taon na ang nakalilipas mula nang muli silang magsimulang magtrabaho sa isang proyekto, na siyang naging simula ng mas malalim na ugnayan sa pagitan nila ni Herbert. Para sa kanya, ang layo sa isa’t isa ay maaaring magsilbing oportunidad upang linawin kung ano nga ba talaga ang nais nilang dalawa sa isa’t isa.

Bagamat may tampuhan sa kasalukuyan, hindi pa rin naiwasang magbigay ng positibong komento si Ruffa tungkol kay Herbert. Ani niya, may mga katangian ang dating alkalde ng Quezon City na patuloy niyang hinahangaan. Ipinakita ni Ruffa na kahit may hindi pagkakaintindihan, nananatili pa rin ang respeto sa pagitan nila.

Isa rin sa mga naging malinaw na punto sa panayam ay ang estado ng kanilang pagsasama. Nilinaw ni Ruffa na hindi sila nagsasama sa iisang bahay. Ayon sa kanya, hindi siya sang-ayon sa ideya ng live-in setup. Para sa aktres, may mga tradisyunal siyang pinaniniwalaan pagdating sa relasyon, at isa na rito ang hindi pagsasama bago ang kasal.

Matagal na palang magkakilala sina Ruffa at Herbert. Sa kanyang pagbabalik-tanaw, inalala ni Ruffa na unang beses silang nagkita noong siya’y 13 taong gulang pa lamang. 

“Nakasalamin pa ako, kulot-kulot ang hair ko… Wala, dedma,” kwento ng aktres na may halong biro at nostalgia. Noong siya naman ay 17 anyos, naalala rin niyang binigyan siya ni Herbert ng isang libro bilang paghahanda para sa kanyang pagsabak sa Miss World pageant.

Naitanong din ni Boy Abunda kung napag-uusapan na ba nila ni Herbert ang tungkol sa kasal. Dito ay muling naging tapat si Ruffa, at inamin niyang hindi pa siya handa sa ganoong hakbang.  “Marriage is very difficult. I don’t know if I’m ready for that step yet. Herbert’s also not ready,” ani niya. 

Ayon pa sa kanya, kahit si Herbert ay tila hindi pa rin handang pumasok sa kasal. Sa ngayon, mas pinahahalagahan niya ang ideya ng pagkakaroon ng lifetime companion — isang taong palaging andiyan, karamay at katuwang sa buhay — kaysa sa pormal na papel ng kasal.