Jericho Rosales Nabiktima Na Rin Ng Deep Fake; Management, May Babala

 Naglabas ng pahayag ang pamunuan ni Jericho Rosales upang ipabatid sa publiko ang tungkol sa isang umiikot na pekeng advertisement na gumagamit ng imahe ng aktor nang walang pahintulot. Ayon sa kanilang babala, ginagamit umano ang larawan ni Jericho sa mga mapanlinlang na patalastas na naglalayong lokohin ang mga tao, lalo na sa social media platforms tulad ng Facebook.

Sa isang post sa Instagram ni Pinky Tady-Angodung noong Sabado, Hunyo 21, ipinahayag na walang kinalaman si Jericho sa alinmang website o Facebook page na nagsasangkot sa kanyang pangalan at larawan. Binanggit sa naturang post na ang ad ay isang halimbawa ng deepfake, kung saan ginamitan ng teknolohiya upang gayahin ang anyo o kilos ng isang tao, sa kasong ito ay si Jericho, para sa mapanlinlang na layunin.

Ayon pa sa opisyal na pahayag ng kampo ng aktor, "The ad in question is a DEEPFAKE and was created without the consent of Jericho or his management.” 

Mariing kinondena ng kampo ang ganitong uri ng pamemeke at nilinaw na hindi kailanman sangkot ang aktor sa mga naturang aktibidad.

Hinimok din ng pamunuan ang publiko na maging mapagmatyag sa mga ganitong klase ng panlilinlang. 

"We urge everyone to remain vigilant and help us report these pages to Facebook. If you come across similar misleading ads, please do not engage and report them immediately,” dagdag pa nila.

Sa kasalukuyan, pinag-aaralan pa ng kampo ni Jericho ang mga susunod na hakbangin upang tugunan ang ilegal na paggamit sa kanyang pagkakakilanlan. Maaaring humantong ito sa pagsasampa ng pormal na reklamo o legal na aksyon laban sa mga responsable sa pagkalat ng pekeng impormasyon at larawan.

Ang mga ganitong uri ng insidente ay hindi na bago sa mundo ng social media, kung saan maraming personalidad, artista, at kilalang tao ang nagiging biktima ng maling paggamit sa kanilang imahe para sa mapandayang layunin. Sa pag-usbong ng teknolohiya gaya ng artificial intelligence at deepfake, mas naging madali para sa ilang grupo na gumawa ng pekeng content na tila totoo, kaya naman mahalagang palaging beripikahin ang pinanggagalingan ng impormasyon.

Nagbigay din ng paalala ang mga tagapamahala ni Jericho sa kanyang mga tagahanga na huwag agad maniwala sa mga ads o posts na tila nagpapakita na ang aktor ay endorsing ng anumang produkto, lalo na kung hindi ito mula sa kanyang verified social media accounts o sa opisyal na pahayag ng kanyang team.

Sa huli, ipinabatid ng kampo ng aktor na patuloy nilang isusulong ang kampanya laban sa maling paggamit ng teknolohiya, at ipaglalaban ang karapatan ni Jericho bilang isang pribadong indibidwal at propesyonal na artista. Ang panawagan nila ay hindi lamang para sa proteksyon ng kanilang kliyente, kundi pati na rin para sa kaligtasan ng mas nakararaming Pilipino mula sa panloloko sa online na mundo.