Sofia Pablo Nabatikos Dahil Sumawsaw Sa PBB Eviction

 Inulan ng batikos online si Kapuso actress Sofia Pablo matapos kumalat ang isang video kung saan makikitang masaya siya sa announcement ng pagka-safe nina Vince Maristela at Brent Manalo sa eviction night ng Pinoy Big Brother noong Sabado. Ayon sa ilang netizens, ang reaksyon umano ni Sofia at ng ilang Kapuso personalities ay tila pagdiriwang din ng pagkaka-evict nina Michael Sager at Emilio Daez.

Kahit malinaw naman sa naging pahayag ni Sofia na ang tuwa niya ay para kay Vince, na matalik niyang kaibigan, hindi pa rin ito sapat para mapigilan ang pambabatikos. Sa isang comment, sinabi niya, “You’ll get it when it’s your bestest friend who gets saved from eviction,” na para sa kanya ay patunay lang ng suporta sa kaibigan. Pero para sa ilang netizens, tila naging “insensitive” ang dating ng kanyang kilos.

Dahil sa pangyayari, hindi naiwasang mapulaan si Sofia ng masasakit na salita gaya ng “OA,” “pabebe,” “insecure,” at “walang empathy.” May ilan pa ngang naglabas ng mga hinala na baka isa raw si Sofia sa tinutukoy ni Michael Sager na Kapuso artist na hindi umano siya feel o tinanggap nang maayos. Ang iba pa, muling binuhay ang isyung may alitan daw si Sofia at Jillian Ward, kung saan si Michael ay naging leading man ni Jillian sa isang serye, kaya raw nadamay siya sa tension.

Isang dagdag pa sa kontrobersiya ay ang isyu ng diumano'y pagbura ni Sofia ng kanyang tweet. Ayon sa ilang netizens, binura raw ni Sofia ang kanyang tweet bilang pag-iwas sa gulo. Subalit nilinaw ito ni Sofia sa isang reply na hindi niya ito sinadyang i-delete at posibleng nawala lang ito o nagkaaberya. Aniya, “I didn’t!!! Nawala nalang pag check ko,” ngunit marami ang nanatiling duda sa paliwanag.

Dahil sa patuloy na bashing, may ilang netizens na nagpayo kay Sofia na iwasan muna ang social media para makapagpahinga at makaiwas sa mga posibleng pagkakamali. Ngunit kahit tila gusto na niyang manahimik, hindi pa rin siya tinigilan, kaya napilitan na rin siyang maglabas ng kanyang saloobin at humingi ng paumanhin.

Sa kanyang post, sinabi ni Sofia, “First of all, sorry to everyone I offended. I had no intentions on being insensitive.” Sinundan pa niya ito ng isang matapang na pahayag na tila tugon sa mga patuloy na bumabatikos sa kanya. “For years, I’ve stayed silent when people called me insecure or accused me of things. But this time, it’s too much. To everyone calling me insecure: You didn’t live it. You weren’t there. You don’t know. So please, don’t speak unless you know the truth.”

Habang patuloy pa rin ang diskusyon sa social media, may mga netizens na kumampi kay Sofia. Ayon sa kanila, malinaw naman sa video at context na ang saya niya ay dahil naligtas si Vince, at hindi dahil na-evict si Michael. Para sa kanila, hindi na dapat humingi ng sorry si Sofia sa bagay na wala naman siyang masamang intensyon.

Sa gitna ng kontrobersiya, lumalabas na ang sitwasyon ay isang halimbawa ng kung paanong maaaring mabaligtad ang mga intensyon sa mundo ng social media. Isang simpleng emosyon para sa isang kaibigan ang naging dahilan ng matinding panghuhusga, at tila patunay ito kung gaano kabilis magbago ang ihip ng opinyon ng publiko—lalo na sa mata ng internet.