John Arcilla, May Mensahe Sa Mga ‘Di Sang-Ayon Sa Dalawang Kandidatong Inendorso Niya

 Hindi napigilan ng premyadong aktor na si John Arcilla ang kanyang sarili na magsalita laban sa mga negatibong komento at akusasyon ng ilang bashers patungkol sa kanyang hayagang pagsuporta sa ilang kandidato sa pagkasenador para sa darating na halalan. Sa isang matapang na pahayag sa Facebook noong Miyerkules, Mayo 7, mariing ipinagtanggol ni John ang kanyang paniniwala at ang mga personalidad na kanyang iniendorso, habang binigyang-diin ang mga dahilan ng kanyang paninindigan.

Ayon sa kanya, karaniwan sa mga taong matino ang pamumuhay, responsable sa pagbabayad ng buwis, at may malasakit sa bansa ay hindi basta-basta pumipili ng kandidato. Aniya, ang mga gaya niya na naniniwala sa tamang liderato ay hindi ginagawa ang pag-endorso para sa pansariling kapakinabangan. Sa halip, ginagawa raw nila ito para sa kapakanan ng mas nakararaming Pilipino, lalo na iyong mga nasa laylayan ng lipunan.

“Hindi nila ito ginagawa para sa SARILI NILA KUNDI PARA SA MGA MAHIHIRAP NA MAMAMAYAN dahil ayaw nila na ang kanilang TAX ay NAPUPUNTA SA BULSA NG MGA PAYASO, TRAPO, BALIMBING AT DYNASTY,” ani ni John.

Dagdag pa ni John, hindi siya nababahala kung marami ang kumokontra sa kanyang mga paniniwala. Para sa kanya, ang mas mahalaga ay makapagsalita siya ng totoo at makatulong sa paggising ng kamalayan ng mga tao. Naniniwala siyang kung patuloy na magbubulag-bulagan ang ilan at panay batikos lang ang alam gawin, ay walang tunay na pagbabago ang mangyayari sa bansa.

Sa kanyang post, binanggit din ng aktor ang mga kandidato sa Senado na kanyang sinusuportahan, kabilang sina Bam Aquino at Kiko Pangilinan. Pareho nang nakapaglingkod sa Senado ang dalawa, at ayon kay John, may napatunayan na umano ang mga ito pagdating sa integridad at pagtatrabaho para sa ikabubuti ng bayan.

Si Bam Aquino ay nagsilbi bilang senador mula 2013 hanggang 2019 at kilala sa pagtutok sa mga programang pangkabuhayan at edukasyon, gaya ng pag-usbong ng micro-entrepreneurship at pagsulong ng libreng edukasyon sa kolehiyo. Samantala, si Kiko Pangilinan ay unang nahalal sa Senado noong 2001 at naging aktibo rin sa mga isyung agrikultura, hustisya, at kabataan. Muli siyang nahalal noong 2016 at nagsilbi hanggang 2022.

Kahit pa may mga kumukuwestiyon sa kanyang suporta sa mga dating mambabatas, naninindigan si John na ang mahalaga ay ang prinsipyo at hindi ang popularidad. Aniya, hindi siya nagpapadala sa kung sino ang sikat o kung anong partido ang malakas—ang mahalaga sa kanya ay kung sino ang tunay na may malasakit at may track record na makatao.

“Kung ayaw n’yong makinig, eh ‘di wala talagang mangyayari. Kaya hanggang kailan tayo mananatili sa ganitong sistema?” saad pa ni John.

Hindi rin bago kay John ang pagsasangkot sa mga usaping panlipunan at pampulitika. Sa ilang panayam sa nakaraan, inamin niyang hindi siya natatakot ipahayag ang kanyang panig basta ito ay may basehan at may layuning makatulong sa bayan. Para sa kanya, ang pagiging artista ay hindi hadlang upang makialam sa mga isyung panlipunan—bagkus ay isang malaking plataporma ito upang magbahagi ng kaalaman at magbigay-liwanag sa mga kababayan.

Sa dulo ng kanyang pahayag, muling hinikayat ni John ang publiko na suriing mabuti ang mga kandidatong kanilang iboboto. Hindi aniya ito usapin ng kasikatan o pag-uugali ng mga artista, kundi usapin ito ng kinabukasan ng bayan.