Isa na ngayong matagumpay na negosyante si Mark Herras, ang kauna-unahang StarStruck Ultimate Male Survivor, matapos niyang pasukin ang mundo ng pagnenegosyo sa gitna ng unti-unting paglimita ng kanyang mga proyekto sa telebisyon.
Sa isang panayam sa programang DTI Asenso Pilipino, inamin ni Mark na malaki ang ipinagbago ng kanyang buhay mula nang simulan niya ang franchising ng Farmer’s Premium Meat Shop, na ngayon ay kanyang pangunahing pinagkukunan ng kita.
“Inaasahan ko lang noon ang showbiz. Hindi ako nagtapos ng college. Ngayon, dito na talaga ako kumikita para sa pamilya ko,” pagbabahagi ni Mark.
Hindi naging madali para kay Mark ang transisyon mula sa pagiging aktor patungo sa pagiging entrepreneur. Ayon sa kanya, naging isang mapait ngunit makabuluhang karanasan ito.
“Dumating ako sa point na nangungutang ako para may magastos sa pamilya ko. Masakit sa loob na, bilang provider, manghiram ng pera. Pero gagawin mo lahat para sa pamilya mo.”
Ngayon ay isa na siyang opisyal na partner at franchisee ng Farmer’s Premium Meat Shop. Ang kanilang negosyo ay may poultry facility at ilang sangay na matatagpuan sa Pangasinan, habang ang sariling branch ni Mark ay nasa U.N. Avenue, Malate, Maynila.
“Twenty years akong nasa showbiz. Ito ang first major business ko. Sa showbiz umaarte ka lang, pero dito, totoong tao ang kaharap mo, totoong produkto ang binebenta mo.”
Ayon pa kay Mark, nagsimula muna siya bilang brand ambassador ng Farmer’s Premium Meat Shop bago niya naisipang mamuhunan at pumasok bilang business partner. Sa kanyang paglalakbay sa mundo ng negosyo, pakiramdam daw niya ay para siyang bumalik sa pagiging estudyante.
“Parang exam—parang math exam! Para akong nag-aaral ulit. Kung seryoso ako, kailangan aralin ko talaga lahat.”
Bagamat hindi na kasing aktibo sa telebisyon, hindi raw tuluyang nawala si Mark sa showbiz. Mayroon pa rin siyang mga proyekto sa independent films, live shows, at ilang guest appearances. Ngunit malinaw sa kanya na ang negosyo na ngayon ang pangunahing haligi ng kanilang kabuhayan.
“Hindi ako active sa TV, pero andiyan pa rin ako. Ang importante, nabubuhay ko ang pamilya ko.”
Ang bagong direksyong tinatahak ni Mark ay nagbibigay inspirasyon sa maraming Pilipino, lalo na sa mga dating umaasa lamang sa iisang kabuhayan. Ipinakita niya na sa panahon ng kawalan ng katiyakan, may pagkakataon pa ring magsimula muli, matuto ng bago, at magtagumpay—lalo na kung ito ay ginagawa para sa mga mahal sa buhay.
Walang komento
Mag-post ng isang Komento
Share your opinion now!