DJ Chacha Nagreak Sa Dagdag Buwis Sa Matatamis Na Inumin: Tax Pa More!

 Nagpahayag ng matinding reaksiyon ang radio personality at social media influencer na si DJ Chacha kaugnay ng isang panukalang batas na layong taasan ang buwis sa mga matatamis na inumin gaya ng soft drinks, sweetened coffee, at iba pang sugar-based beverages.

Sa kanyang social media post sa platform na X (dating Twitter), hindi napigilan ni DJ Chacha ang kanyang pagkadismaya. Aniya sa isang sarcastic at puno ng hinanakit na tono:

“Oh wow, a 20%-40% tax on sweet drinks? But sure, go ahead, TAX PA MORE. Because clearly, the problem is sugar, not corruption.”

Bagama’t ang panukala ay nakatuon sa kalusugan, malinaw ang punto ni DJ Chacha—hindi ang asukal ang pangunahing sanhi ng suliranin sa bansa, kundi ang malalim at matagal nang isyu ng katiwalian sa pamahalaan. Ang kanyang pahayag ay sumasalamin sa sentimyento ng maraming mamamayan na tila patuloy na pinapasan ang mga bagong buwis habang nananatiling hindi masolusyunan ang mas malalaking problema ng bansa.

Ang kanyang reaksyon ay kasunod ng paghahain ng isang panukalang batas nina mga mambabatas na sina Cielo Krisel Lagman, Arlene Bag-ao, at Leila de Lima, na naglalayong dagdagan ang buwis sa mga sugar-sweetened beverages (SSBs). Ayon sa panukala, mula sa kasalukuyang ₱6 per liter, itataas ito sa ₱20 per liter para sa mga karaniwang inumin na may asukal. Para naman sa mga inuming gumagamit ng high fructose corn syrup, tataas ang buwis mula ₱12 patungong ₱40 kada litro.

Hindi lang mga soft drinks ang tatamaan ng dagdag-buwis. Maging ang mga produkto tulad ng flavored milk, fermented milk drinks, flavored non-dairy beverages, at sweetened coffee products ay isasama na rin sa listahan ng mga papatawan ng karagdagang excise tax na aabot sa ₱6 kada litro.

Ayon sa mga may-akda ng panukala, ang karagdagang buwis mula sa mga produktong ito ay hindi lamang basta-basta ipapataw. May nakalaan na pondo para sa mga pangunahing serbisyo, tulad ng:

40% para sa PhilHealth

10% para sa Health Facilities Enhancement Program ng Department of Health (DOH)

50% para sa mga nutrition programs ng Department of the Interior and Local Government (DILG)

Ayon sa mga mambabatas, layunin ng hakbang na ito na bawasan ang mga kaso ng obesity sa bansa, lalo na sa kabataan. Dagdag pa nila, nais din nilang itaguyod ang isang mas malusog na pamumuhay sa pamamagitan ng pagbawas sa konsumo ng labis na matatamis na pagkain at inumin.

Gayunman, para sa ilang mamamayan tulad ni DJ Chacha, tila hindi sapat ang paliwanag na ito. Para sa kanya, imbes na lumikha ng mas maraming buwis na ang burden ay pinapasan ng karaniwang tao, mas dapat pagtuunan ng pansin ang ugnat ng katiwalian sa pamahalaan na siyang tunay na ugat ng kakulangan sa pondo.

Marami rin sa mga netizens ang umayon sa kanyang sentimyento, at naging daan ito para sa mas malawak na diskusyon online tungkol sa patas na pagbubuwis, transparency ng gobyerno sa paggamit ng pondo, at ang tunay na epekto ng mga ganitong polisiya sa mga ordinaryong Pilipino.

Habang wala pang pinal na desisyon ukol sa panukalang ito, malinaw na muli na namang naging tulay si DJ Chacha ng boses ng masa—isang paalala na sa bawat panukalang batas, nararapat na isaalang-alang ang kabuuang epekto nito, hindi lamang sa kalusugan kundi sa kabuhayan ng bawat Pilipino.