Dahilan ng Pagkapurdoy Ni Nora Aunor Isiniwalat ni Matet

 Diretsahang sinagot ni Matet De Leon ang mga usap-usapan tungkol sa diumano’y pagiging mahirap sa pera ng kanyang yumaong ina, ang tinaguriang Superstar at National Artist for Film and Broadcast Arts na si Nora Aunor. Sa kabila ng pambihirang tagumpay ni Nora sa mundo ng pelikula at telebisyon, matagal nang may haka-haka na hindi umano siya nakapag-ipon ng sapat para sa kanyang sarili.

Sa isang panayam sa vlog na “Pera At Buhay” ng kilalang financial coach na si Chinkee Tan, ipinaliwanag ni Matet ang tunay na dahilan kung bakit hindi naiipon ng kanyang ina ang mga kinikita nito. Ayon sa aktres, hindi dahil sa kapabayaan o maling pamamahala ng pera ang ugat ng problema, kundi sa labis na pagiging mapagbigay at maalalahanin ni Nora sa mga taong nakapaligid sa kanya.

“Alam mo, Sir Chinkee, i-ano na natin sa mga tao tutal nandito naman na tayo. Kinakana nila ang hirap, purita nanay ko. Alam n’yo kung bakit? Sabihin ko ha, dito na. Ang mommy ko kasi pay before or pay after pagdating sa taping. Ang mommy ko, papipilahin ‘yong mga tao. ‘Yong suweldo niya sa bag, ibibigay niya ‘yan sa staff,”  panimula ni Matet.

Ibinahagi pa niya na sa mga panahong aktibo pa si Nora sa mga proyekto, kadalasan ay bayad agad ito bago o pagkatapos ng taping. At sa halip na itabi o ipunin ang pera, mas pinipili raw ng Superstar na ibahagi ito sa mga kasamahan sa trabaho.

“Ang mommy ko kasi, kapag natanggap na ang sweldo, pipilahan niya agad ang mga tao. Nasa bag pa lang ‘yong pera niya, ipamimigay na niya,” kwento ni Matet. “At hindi ito barya lang, ha. Hindi ito ₱300 o ₱500. Minsan ₱2,000, ₱1,000 ang ibinibigay niya sa bawat tao. Lahat, mula cameraman hanggang staff, walang exempted.”

Ayon kay Matet, ganoon talaga ang ugali ng kanyang ina—mahirap para dito na makitang nahihirapan ang ibang tao. Kahit na minsan siya mismo ay nangungulila sa pera, inuuna pa rin ni Nora ang kapakanan ng mga nakatrabaho at nakasama niya sa industriya.

Hindi rin lingid kay Matet na maraming tao ang maaaring hindi makaintindi sa ganitong klase ng ugali, lalo na pagdating sa usaping pinansyal. Ngunit para sa kanya, ito ang isa sa mga katangiang nagpakilala at nagpatatag sa imahe ng Superstar—ang walang kapantay na malasakit at generosity.

Dagdag pa ni Matet, hindi lang sa mga staff sa set nagbibigay ng tulong ang kanyang ina. May mga pagkakataon din na kapag may lumapit na nangangailangan, kahit hindi personal na kilala, ay handa itong mag-abot ng tulong pinansyal. “Para sa kanya, mas mahalaga na makatulong kaysa mag-ipon ng malaking halaga,” paliwanag pa niya.

Sa huli, ipinunto ni Matet na bagaman maaaring hindi naipon ng kanyang ina ang malaking bahagi ng kinita nito sa mahabang panahon sa showbiz, hindi matatawaran ang yaman na iniwan ni Nora Aunor sa puso ng maraming tao—ang kabutihang-loob, pagiging matulungin, at walang pag-aalinlangan sa pagtulong sa nangangailangan.

Para kay Matet, mas mahalaga ang ganitong klase ng pamana kaysa anumang materyal na bagay. “Hindi nasusukat sa dami ng pera sa bangko ang halaga ng isang tao,” pagtatapos niya. “Ang nanay ko, mayaman sa pagmamahal at respeto ng mga tao. At para sa akin, iyon ang tunay na yaman.”