Ipinaabot ni Miss Universe Philippines 2025 Ahtisa Manalo ang kanyang matibay na paninindigan hinggil sa kahalagahan ng edukasyon sa sexual health, lalo na sa harap ng patuloy na pagtaas ng mga kaso ng human immunodeficiency virus (HIV) sa mga kabataang Pilipino.
Sa isang post sa kanyang opisyal na Facebook page, binigyang-diin ng beauty queen ang agarang pangangailangan para sa mas epektibong hakbang ng pamahalaan upang tugunan ang krisis sa kalusugan na kinakaharap ngayon ng bansa. Ginamit ni Ahtisa ang kanyang plataporma upang iparating ang kanyang suporta sa panawagan ng Department of Health (DOH) na ideklara na ang HIV bilang isang National Public Health Emergency.
Ayon sa datos ng DOH, tumaas nang halos 500 porsiyento ang bilang ng mga kabataang tinatamaan ng HIV sa mga nakaraang taon. Para kay Ahtisa, hindi ito basta simpleng numero sa estadistika — ito ay malinaw na babala at isang panawagan para sa konkretong aksyon. Aniya, kailangang tugunan ito sa pamamagitan ng pagbibigay ng sapat at tamang kaalaman sa mga kabataan ukol sa kanilang sexual health.
“As a beauty queen and an advocate for youth empowerment, I cannot stay silent in the face of a crisis that affects the very heart of our future. The 500% rise in HIV cases among Filipino youth is more than just a statistic — it is a call to action,” pahayag niya sa social media.
Naniniwala si Ahtisa na ang tamang impormasyon ay mahalagang sandata laban sa paglaganap ng mga sakit na gaya ng HIV. Kailangan umano ng kabataan ng ligtas at suportadong espasyo kung saan maaari silang matuto tungkol sa kanilang katawan, karapatan, at responsibilidad pagdating sa pakikipagtalik at pangangalaga sa sarili.
Bukod pa rito, binigyang-diin din ng beauty queen na ang edukasyon sa sexual health ay hindi lamang dapat para sa mga nasa high school o college. Dapat ay maaga pa lang ay may sapat nang kaalaman ang kabataan sa mga bagay na may kinalaman sa reproductive health, sexually transmitted infections (STIs), at ang kahalagahan ng pagkakaroon ng informed choices.
Ipinunto rin niya na ang stigma at kakulangan sa bukas na usapan tungkol sa sexual health ang isa sa mga dahilan kung bakit hindi agad nakakakuha ng tamang impormasyon ang maraming kabataan. Dagdag pa niya, ang pagtalakay sa mga ganitong sensitibong usapin ay hindi dapat ituring na bawal, kundi isang mahalagang bahagi ng pangangalaga sa kalusugan ng bawat isa.
Sa panahon ngayon na laganap ang maling impormasyon at myths tungkol sa HIV at sexual health, nanawagan si Ahtisa sa mga institusyon — paaralan, pamahalaan, at maging sa mga magulang — na pagkaisahan ang pagbibigay ng dekalidad na edukasyong pangkalusugan sa mga kabataan.
“This dramatic increase reflects a lack of access to accurate, compassionate, and age-appropriate sexual health education,” ani Ahtisa.
“Proper education is not about encouraging recklessness — it’s about equipping young people with the truth, the tools, and the confidence to make informed choices about their health and well-being.
“Education is empowerment — and empowered youth can change the world. Let us rise together, not in fear, but in knowledge, compassion, and responsibility,” dagdag pa niya.
Ang panawagan ni Ahtisa ay patunay na ang mga beauty queen ngayon ay hindi lamang nakatuon sa pisikal na kagandahan kundi aktibong nakikilahok sa mga usaping panlipunan. Sa kanyang paggamit ng kanyang tinig para sa isang makabuluhang adbokasiya, umaasa siyang mas maraming kabataan at institusyon ang matauhan at kumilos para masugpo ang patuloy na pagtaas ng HIV sa bansa.
Walang komento
Mag-post ng isang Komento
Share your opinion now!