Manny Pacquiao, Naglabas Ng Mensahe Sa Pagluluksa Sa Pamamaalam Ni Freddie Aguilar

 Nararamdaman ang matinding pagdadalamhati ng buong bansa sa pagpanaw ng isa sa pinakatanyag na haligi ng Original Pilipino Music (OPM) na si Freddie Aguilar. Isa sa mga nagpahayag ng kanyang pakikiramay ay ang dating senador at kilalang boksingero na si Manny Pacquiao.

Sa kanyang opisyal na social media account, ipinaabot ni Pacquiao ang kanyang taos-pusong pakikiramay sa pamilya at mga mahal sa buhay ng yumaong musikero. Ayon sa kanya, malalim ang kanyang kalungkutan sa pagkawala ng isang taong malaki ang naging ambag sa musikang Pilipino at sa pagkakakilanlan ng ating lahi.

Pumanaw si Ka Freddie Aguilar noong ika-27 ng Mayo sa edad na 72, matapos ang ilang araw na pananatili sa Philippine Heart Center. Ayon sa mga ulat, cardiac arrest ang itinuturong dahilan ng kanyang pagpanaw.

Sa kanyang mensahe, inilahad ni Pacquiao kung gaano siya naapektuhan ng mga awitin ni Freddie Aguilar, partikular na ang kantang “Anak.” 

Aniya, “I am deeply saddened by the passing of Freddie Aguilar, a true legend and icon of Original Pilipino Music.

“His song ‘Anak’ touched my heart. It spoke to me, and to millions of people around the world. Totoong-totoo ang bawat salita.

“Ramdam mo ang sakit, ang pagsisisi, at ang pagmamahal ng isang anak,” lahad ng dating senador.

Dagdag pa ng dating mambabatas, malalim ang naging epekto ng musika ni Freddie Aguilar hindi lamang sa mga Pilipino, kundi maging sa iba’t ibang lahi sa iba’t ibang panig ng mundo. Hindi lamang daw ito basta musika, kundi isang salamin ng ating kultura, ng ating kasaysayan, at ng damdaming Pilipino.

“Malaki ang naiambag niya sa kultura at musika ng Pilipinas. Hindi natin siya malilimutan.

Malaki rin ang pasasalamat ni Pacquiao sa naging kontribusyon ni Freddie sa sining at kultura ng bansa. Sa kanyang mga awitin, naiparating nito ang mga saloobin at karanasan ng mga karaniwang Pilipino. Dahil dito, mananatili raw si Freddie sa alaala at puso ng sambayanang Pilipino.

Hindi rin nakalimot si Pacquiao na magpaabot ng pakikiramay sa mga naulilang pamilya at kaibigan ni Ka Freddie. 

Aniya, “To his family and friends, my heartfelt condolences. May you find strength in the legacy he leaves behind.”

Sa pagtatapos ng kanyang mensahe, taos-pusong nagpasalamat si Manny kay Ka Freddie para sa musika, at para sa pagiging boses ng masang Pilipino sa loob ng maraming dekada.

“Thank you, Freddie, for the music. Thank you for telling our stories. Paalam, Ka Freddie.”

Ang pamamaalam ni Ka Freddie Aguilar ay hindi lamang isang pagkawala sa larangan ng musika, kundi isang malaking dagok sa kulturang Pilipino. Subalit sa likod ng pagluluksa, mananatili ang kanyang mga awitin bilang buhay na alaala ng kanyang pagmamahal sa bayan at sa kanyang sining.