Jason Dy, Hiniritan Ng ‘collab’ Sina KZ Tandingan, Yeng Constantino

 Isang dekada na ang lumipas mula nang unang makilala si Jason Dy sa industriya ng musika, at ngayong taon ay ipinagdiriwang niya ito sa pamamagitan ng isang espesyal na concert na tiyak na puno ng emosyon, sorpresa, at talento. Gaganapin ang kanyang 10th anniversary concert na pinamagatang “SoliDYfied” sa darating na Hunyo 27 sa Newport Performing Arts Theater—at ayon mismo kay Jason, ito’y magiging isang gabing hindi madaling malilimutan.

Sa naganap na contract signing event kasama ang Star Music, inilahad ni Jason ang ilan sa mga dapat abangan sa nalalapit niyang pagtatanghal. Ayon sa kanya, maraming sorpresa ang inihanda para sa kanyang mga tagahanga. Sa pangunguna ni John Prats bilang direktor ng concert, sigurado raw na magiging maayos at magaan ang daloy ng buong palabas. Bukod dito, kaabang-abang din ang mga magiging panauhing pandangal na sina Yeng Constantino at KZ Tandingan, na hindi lang basta performers kundi katuwang niya rin sa produksyon ng event.

Ibinahagi pa ni Jason ang likod ng desisyong isama sina Yeng at KZ sa concert hindi lamang bilang performers kundi bilang co-producers. 

“We’re gonna be announcing the special guests soon pero bilang nag-produce na rin sila, kinumbinsi ko sila na baka pwede mag-guest na rin sila kaya abangan niyo po ‘yung special collaboration naming tatlo nina Yeng at KZ,” pahayag niya na may halong pananabik.

Samantala, hindi rin nagpahuli si Jason pagdating sa kanyang preparasyon para sa kanyang overall look sa concert. Aniya, bukod sa musika, mahalaga rin sa kanya ang visual presentation ng kanyang performance. 

“I already reached out to designers that I wanna work with and binato ko na sa kanila ‘yung ideas ko, the clothes have to match the songs I’m performing. Expect something shiny, sparkly, kakaiba!” dagdag pa ng singer.

Hindi lang ang concert ang dahilan ng kanyang pagdiriwang ngayong taon. Inanunsyo rin ni Jason na nakatakda siyang maglabas ng dalawang album bilang bahagi ng kanyang ika-sampung taon sa industriya. Ang unang album ay isang anniversary compilation kung saan tampok ang kanyang mga pinakasikat at minahal na kanta sa nakalipas na dekada. Ito ay ilalabas sa mismong araw ng kanyang concert, Hunyo 27.

Ang ikalawang album naman ay isang koleksyon ng mga original songs, kung saan ipapamalas ni Jason ang kanyang mga bagong likha at musical direction. Bagamat hindi pa inilalabas ang buong detalye ng naturang album, tiniyak niyang ito ay mas personal, mas mature, at mas malapit sa kanyang kasalukuyang estado bilang artist.

Sa gitna ng mga pagbabagong kanyang pinagdaanan sa kanyang karera, nananatiling inspirasyon si Jason Dy sa maraming tagahanga—isang patunay na sa loob ng isang dekada, ang talento at determinasyon ay maaaring dalhin ang isang artist sa mas mataas na antas ng tagumpay.

Ang “SoliDYfied” ay hindi lamang isang concert—ito ay isang selebrasyon ng musika, paglalakbay, at pagbabalik-tanaw sa mga tagumpay at pagsubok na hinarap ni Jason sa loob ng sampung taon. Kung kaya’t para sa mga tagahanga ng tunay na OPM, ito ay isang gabi na hindi dapat palampasin.